نوئیڈا: آگ لگنے سے دو بچیاں ہلاک

نوئیڈا کے فیز 3 میں واقع ایک پانچ منزلہ مکان میں آگ لگ گئی جس کے سبب دو بچیاں ہلاک ہوگئیں۔

ریاست اتر پردیش کے ضلع گوتم بدھ نگر نوئیڈا فیز 3 تھانہ کے سیکٹر 122 میں واقع ایک پانچ منزلہ عمارت میں آگ لگ گئی۔ اس حادثے میں دو معصوم لڑکیاں جھلس کر ہلاک ہوگئیں جب کہ دیگر کو بچالیا گیا۔

ہلاک ہونے والی لڑکیوں کی شناخت کرتیکا (9 سال) اور رودراکشی (12 سال) کے طور پر ہوئی ہے۔ پولیس نے دونوں لاشوں کو قبضے میں لے کر پوسٹ مارٹم کے لیے بھیج دیا ہے۔ گھر میں آگ لگنے کی خبر پھیلتے ہی آس پاس کے لوگوں میں افراتفری پھیل گئی۔

آگ پانچ منزلہ عمارت کی نچلی منزل پر لگی۔ حادثے کی اطلاع ملتے ہی فائر بریگیڈ کی ٹیم موقع پر پہنچی اور آگ پر قابو پالیا۔ تمام زخمیوں کو ہسپتال میں داخل کرایا گیا ہے۔

حادثے کے دوران پہلی منزل پر رہنے والے پانچ افراد نے گیس پائپ (پی این جی) کی مدد سے نیچے اتر کر اپنی جان بچائی۔ ساتھ ہی کچھ لوگوں کو کپڑوں کی مدد سے نیچے لایا گیا۔