بانڈی پورہ معاملہ: بی جے وائی ایم کا پاکستان کے خلاف احتجاج

مظاہرین نے اس موقع پر ایک پتلہ بھی نذر آتش کیا اور پاکستان مردہ باد کے نعرے لگائے۔

شمالی کشمیر کے ضلع بانڈی پورہ میں بی جے پی سابق ضلع صدر کی ہلاکت کے خلاف بی جے وائی ایم نے آج جموں کے ادھم پور میں احتجاج کیا اور جموں و کشمیر سے عسکریت پسندی کا خاتمہ کرنے کا مطالبہ کیا۔

قابل ذکر ہے کہ گذشتہ رات بانڈی پورہ میں بی جے پی کے سابق ضلع سربراہ وسیم باری، اس کے بھائی اور والد پر عسکریت پسندوں نے گولیاں چلائی اور انہیں ہلاک کردیا تھا۔

بی جے پی سے منسلک بھارتیہ جنتا یووا مورچہ کے ضلع صدر سوشانت گپتا کی صدارت میں گول مارکیٹ میں وسیم باری اور اس کے کنبے کے اراکین پر کئے گئے حملے کے خلاف احتجاج کیا گیا۔

مظاہرین نے اس موقع پر ایک پتلہ بھی نذر آتش کیا اور پاکستان مردہ باد کے نعرے لگائے۔

اس موقع پر صحافیوں سے بات کرتے ہوئے سوشانت گپتا نے کہا کہ عسکریت پسندوں نے غیر مسلح افراد کو نشانہ بنا کر بزدلی کا مظاہرہ کیا ہے۔

انہوں نے کہا کہ وزیر اعظم نریندر مودی کی پرامن پالیسیوں کی وجہ سے عسکریت پسند بی جے پی قائدین اور کارکنوں کو نشانہ بنا رہے ہیں جسے وہ کسی بھی صورت میں برداشت نہیں کریں گے۔

انہوں نے ملک کے وزیر دفاع راج ناتھ سنگھ سے مطالبہ کیا کہ بی جے پی قائدین کی ہلاکتوں میں ملوث افراد کو کڑی سزا دی جائے اور وادی میں عسکریت پسندی کا صفایا کیا جائے۔

انہوں نے کہا کہ اب وقت آگیا ہے کہ پاکستان کو اپنی زبان میں جواب دیا جائے۔