حیدرآباد: سڑک حادثہ میں تین افراد ہلاک، ویڈیو وائرل

حیدرآباد میں ایک سڑک حادثہ میں 3 افراد ہلاک ہوگئے۔ ان تینوں کا تعلق مہاراشٹرا سے تھا۔ یہ لوگ حیدرآباد کے لنگرحوض علاقہ میں مقیم تھے۔

تلنگانہ کے حیدرآباد میں موٹر سیکل پر جارہے تین افراد ریڈیمیکس گاڑی کے نیچے آکر ہلاک ہوگئے۔ اطلاعات کے مطابق مہاراشٹرا سے تعلق رکھنے والے تین افراد موٹر سائیکل پر جارہے تھے کہ اچانک بریک لگنے کے بعد پیچھے سے آرہی ریڈیمیکس گاڑی نے تینوں کو رونڈ ڈالا۔ تینوں کی موقع پر ہی موت ہوگئی۔

پولیس فوری طور پر حادثہ کے مقام پر پہنچ گئی اور تینوں کی لاشوں کو مقامی اسپتال منتقل کردیا۔ پولیس نے بتایا کہ یہ تینوں افراد شاستری پورم میں ایک نجی تقریب میں شرکت کرکے لوٹ رہے تھے کہ یہ حادثہ پیش آیا۔ ان کی شناخت قمرالدین، ببلو اور جمیل کی حیثیت سے کی گئی۔ یہ تینوں حیدرآباد کے لنگرحوض علاقہ میں مقیم تھے اور سبزی فروخت کیا کرتے تھے۔

پولیس نے مزید بتایا کہ تینوں نے ہیلمٹ نہیں پہنا تھا تاہم تیز رفتاری حادثہ کی وجہ ہے۔ پولیس نے لوگوں کو گاڑی چلاتے وقت چوکس رہنے اور بغیر ہیلمٹ سفر نہ کرنے کا مشورہ دیا۔ ٹرافک قوانین پر سختی سے عمل پیرا ہونے کی بھی تلقین کی۔ پولیس نے اس معاملہ میں مقدمہ درج کرکے تحقیقات کا آغاز کیا ہے۔