نائب صدرجمہوریہ نے ایلورو واقعے پر تشویش ظاہرکی

ایلورو میں پچھلےپانچ روز سے متعدد افراد کو مرگی، چکر اور منہ میں جھاگ لگنے کی علامات کے ساتھ مختلف اسپتالوں میں داخل کیا گیا ہے۔ ڈاکٹرز نے کہا کہ وہ متاثرین کی بیماری کا پتہ لگانے کی کوشش کررہے ہیں۔

نائب صدرجمہوریہ ہند وینکیا نائیڈو نے آندھراپردیش کے ایلورو شہر میں نامعلوم بیماری کی وجہ سے پیدا ہونے والی الجھن پر تشویش کا اظہار کیا۔انھوں نے ضلع کلکٹر اور اعلی افسران سے بات کرنے کے بعد واقعے کی تفصیلات کا پتہ لگایا۔ بتایا گیا کہ مقامی ڈاکٹروں کے ہمراہ منگلگری ایمس کی میڈیکل ٹیم نے مریضوں کی تشخیص کی۔تاہم، افسران نے نائب صدر کو بتایا کہ طبی معائنے میں بیماری کی وجہ معلوم نہیں ہوسکی۔

اس ضمن میں نائب صدر نے مرکزی وزیر صحت سے ملاقات کی۔ اور تفصیلی تبادلہ خیال کیا۔ مرکزی وزارت صحت نے اس بیماری کی تحقیق کے لیےتین طبی ماہرین کی ایک ٹیم تشکیل دی ہے۔

ایلورو میں پچھلےپانچ روز سے کئی لوگوں کو مرگی، چکر اور منہ میں جھاگ لگنے کی علامات کے ساتھ مختلف اسپتالوں میں داخل کیا گیا ہے۔ متاثرین میں زیادہ تر بچوں اور خواتین کی موجودگی تشویش کا باعث ہے۔ تاہم، ڈاکٹروں کی ابتدائی جانچ پڑتال میں بتایا گیا کہ یہ کوئی متعدی بیماری نہیں ہے۔