Bilkis Bano Case بلقیس بانو کے قصورواروں کی رہائی پر سپریم کورٹ مداخلت کرے، کے کویتا

ٹی آر ایس کی رکن قانون ساز کونسل کلوا کنٹلہ کویتا نے بلقیس بانو کیس کے مجرموں کی رہائی پر کہا کہ اس شرمناک فیصلے کو فوری طور پر واپس لیا جانا چاہیے تاکہ شہریوں کا قانون پر سے اعتماد نہ اٹھے اور نربھیا کیس جیسے مزید کیسز نہ ہوں اور کوئی بھی خاتون بلقیس بانو کی طرح متاثر نہ ہو۔ TRS leader K Kavitha slams release of Bilkis Banos rapists

حیدرآباد: ٹی آر ایس کی رکن قانون ساز کونسل کلواکنٹلہ کویتا نے ٹوئٹ کرتے ہوئے کہا کہ آزادی کے امرت مہوتسو کے موقع پر جنسی زیادتی اور قتل جیسے گھناؤنے جرائم کے مجرمین کی رہائی در اصل اس مبارک دن کو داغدار کرنے کے مترادف ہے۔ جب کہ مرکزی حکومت نے خود ریاستی حکومتوں کو جون 2022 میں رہنمایانہ خطوط روانہ کیے تھے جس میں جنسی زیادتی کرنے اور عمر قید کی سزا پانے والے مجرموں کو معافی کے اہل نہیں مانا گیا ہے۔

اس کے باوجود گجرات کی بی جے پی حکومت نے پانچ ماہ کی حاملہ بلقیس بانو کے ساتھ جنسی زیادتی کرنے والوں اور ان کی تین سالہ بچی کے قاتلوں کو معافی دے کر وحشیانہ سوچ کی حوصلہ افزائی کی ہے۔ یہ قانون و انصاف کی روح اور مکمل طور پر انسانیت کے خلاف ہے۔ انہوں نے مزید بتایا کہ وہ ایک عورت ہونے کے ناطے بلقیس بانو کے درد اور خوف کو محسوس کر سکتی ہیں۔ جیل سے باہر آتے ہی زانیوں اور قاتلوں کی جس طرح عزت کی گئی، وہ مہذب معاشرے کے منہ پر تھپڑ ہے۔ اس خطرناک روایت کو شروع سے ہی روکنا اشد ضروری ہے۔

اس شرمناک فیصلے کو فوری طور پر واپس لیا جانا چاہیے تاکہ شہریوں کا قانون پر سے اعتماد نہ اٹھ جائے اور نربھیا کیس جیسے مزید کیسز نہ ہو اور کوئی بھی خاتون بلقیس بانو کی طرح متاثر نہ ہو۔ انہوں نے سپریم کورٹ سے بھی اس معاملے میں مداخلت کرتے ہوئے از خود نوٹس لینے کی درخواست کی ہے۔ TRS Leader K Kavitha seeks SC intervention in Bilkis Bano Case