پولیس اہلکار کی کورونا سے موت

1985میں مہلوک اہلکار نے پولیس محکمہ میں ملازمت اختیار کی تھی۔

حیدرآباد کے ایک اور پولیس عہدیدار کی کورونا سے موت ہوگئی۔سائبر آباد پولیس کمشنریٹ کے حدود کے میاں پور پولیس اسٹیشن میں تعینات اسسٹنٹ سب انسپکٹر جس کی شناخت 57سالہ وشواناتھم کے طورپر کی گئی ہے، کی کل شب کورونا کی وجہ سے موت ہوگئی۔

پسماندگان میں اہلیہ کے علاوہ تین فرزندان ہیں۔میاں پور پولیس کے مطابق وشواناتھم 18اگست کو کورونا سے متاثر ہوئے تھے،جس کے بعد انھیں ایک نجی اسپتال میں داخل کیاگیا،جہاں علاج کے دوران موت ہوگئی۔

اس عہدیدار کا تعلق سنگاریڈی ضلع کے جھرہ سنگم سے ہے۔1985میں اس نے پولیس میں ملازمت اختیار کی تھی اور ضلع میدک کے مختلف پولیس اسٹیشنوں میں خدمات انجام دی تھی۔2010میں اس کو ترقی دیتے ہوئے ہیڈ کانسٹیبل بنایاگیا تھا۔میاں پور پولیس اسٹیشن میں 2018میں اس کو اے ایس آئی کے طورپر ترقی دی گئی۔