حیدرآباد کو ٹکنالوجی کے ساتھ ساتھ مصروف ترین شہر کا اعزاز حاصل ہے، جہاں آج ہر فرد مصروف دکھائی دیتا ہے۔ اس بھاگ دوڑ کی زندگی میں انسان بازار کے کھانوں پر منحصر ہے، عوام کی اس ضرورت کو پورا کرنے کے لیے ہوٹل کے علاوہ درجنوں موبائل ایپس بھی متعارف کی گئیں، جس کے ذریعے کھانا دروازے تک پہنچایا جاتا ہے۔
لیکن اس کے برعکس ایسے بھی لوگ ہیں جو کھانے میں احتیاط کرتے ہوئے بازاری غذا سے پرہیز کرتے ہیں۔
ان دنوں حیدرآباد کے مختلف علاقوں میں جوار کی روٹی کا چلن عام ہوچکا ہے، عوام بازاری غذا پر اب جوار کی روٹی کو ترجیح دینے لگے ہیں۔
کرناٹک سے تعلق رکھنے والا ایسا ہی ایک خاندان حیدرآباد کے علاقے ملے پلی میں جوار کی روٹی کا کاروبار کرتا ہے۔ یہ خاندان گزشتہ دو برس سے یہاں کے عوام کو جوار کی روٹی فروخت کرکے اپنے بچوں کی پرورش کررہا ہے، ان کی روٹیاں عوام میں کافی مقبولیت حاصل کرلی ہے۔
روٹی فروش عبد الرحیم نے ای ٹی وی بھارت کو بتایا کہ یہ روٹی چوں کہ صحت کے لیے مفید ہے اس لیے عوام اسے دلچسپی سے کھاتے ہیں۔
