تلنگانہ: وکیل جوڑے کے قتل کی سی بی آئی جانچ کا مطالبہ

تلنگانہ ہائی کورٹ کے وکیل جوڑے کے بہیمانہ قتل کے واقعہ کی سی بی آئی جانچ کروانے کامطالبہ کرتے ہوئے وکلاء نے احتجاج کیا۔

کوکٹ پلی کورٹ بارایسوسی ایشن کے وکلا نے اس واردات کی جامع سی بی آئی جانچ کا مطالبہ کرتے ہوئے احتجاجی ریلی نکالی اور عدالت کے کام کاج کا بائیکاٹ کیا۔

ان وکلا نے اپنے مطالبہ کی حمایت میں نعرے بازی بھی کی اور وکلا کے تحفظ کے لئے قانون سازی کی ضرورت بھی ظاہرکی۔ان وکلا نے انتباہ دیا کہ وکلا کے تحفظ کے لئے قانون سازی نہ کرنے پر احتجاج میں شدت پیدا کی جائے گی۔

انہوں نے کہاکہ تلنگانہ تحریک میں وکلا کا اہم رول رہا ہے۔ اگر وکلا کے تحفظ کو یقینی بنانے کے لئے حکومت قانون سازی نہیں کرے گی تو ایسے واقعات کے اعادہ کا امکان ہے۔ انہوں نے کہاکہ انہیں اس دوہرے قتل کی واردات پر کئی شبہات ہیں جس کا ازالہ سی بی آئی کی جانچ کے ذریعہ ہی ممکن ہے۔ انہوں نے کہاکہ وکلا کے تحفظ کے مسئلہ پر سنجیدگی کے ساتھ مرکزی اور ریاستی حکومت کی جانب سے غور کرنے کا یہ موزوں وقت ہے۔