تلنگانہ کے وزیراعلی کا 14 اپریل کو ناگرجناساگر حلقہ میں جلسہ

وزیراعلی کے چندر شیکھر راو 14 اپریل کو حلقہ اسمبلی ناگرجناساگر کے ضمنی انتخابات کی تشہیری مہم میں حصہ لیں گے۔

حلقہ اسمبلی ناگرجناساگر کے ضمنی انتخابات کی تشہیری مہم کے طور پر اس ماہ کی 14تاریخ کو ضلع نلگنڈہ کے انومولو منڈل کے حدود میں وزیراعلی کے چندر شیکھر راو کا جلسہ منعقد کیا جائے گا۔

حکمران جماعت ٹی آرایس کے رکن اسمبلی این نرسمہلو کی موت کی وجہ سے اس حلقہ کا ضمنی انتخاب ضروری ہوگیا ہے۔ٹی آرایس نے ان کے بیٹے این بھگت کو اس حلقہ سے امیدوار بنایا ہے۔ان کی انتخابی مہم میں ریاستی وزرا، ارکان اسمبلی، ارکان کونسل اور ٹی آرایس کے لیڈروں کی بڑی تعداد حصہ لے رہی ہے۔

ٹی آر ایس کی انتخابی تشہیری مہم مواضعات میں شدت اختیار کرتی جارہی ہے اور اس خصوص میں وزیراعلی کے جلسہ کے سلسلہ میں مقامی ٹی آرایس کیڈر میں جوش وخروش میں اضافہ دیکھا جارہا ہے۔اس جلسہ میں حلقہ کے تمام منڈلوں سے عوام کی کثیر تعداد کی شرکت کی توقع ہے۔جلسہ میں تقریبا 50 ہزار افراد کے لئے انتظامات کئے جارہے ہیں۔

یواین آئی