تلنگانہ میں متحدہ مجلس مشائخ کی جانب سے نجی چینل اور اس کے صحافی کے خلاف پولیس میں شکایت درج کروائی گئی۔
اس تنظیم کی جانب سے گزشتہ روز ایک نجی چینل پر لائیو شو کے دوران حضرت خواجہ غریب نوازؒ کی شان میں گستاخی کرنے کی پاداش میں چینل کے صحافی کے خلاف بہادر پورہ پولیس اسٹیشن میں شکایت درج کروائی۔
مشائخ کے وفد نے کمشنر حیدرآباد سٹی پولیس انجنی کمار سے ملاقات کر کے تمام واقعہ سے واقف کروایا۔
پولیس کمشنر سے ملاقات کے بعد وفد نے ای ٹی وی بھارت کو تفصیلات سے واقف کراتے ہوئے بتایا کہ کمشنر صاحب جو خود اولیاء اللہ سے عقیدت رکھتے ہیں اس پر افسوس کا اظہار کیا۔
مولانا سید آل مصطفٰی الموسوی نے بتایا کہ 'مسلمانوں کے خلاف زہر اگلتے اگلتے متعصب ذہنیت کے حامل افراد کے ذہن اتنے گندے ہو چکے ہیں کہ اب وہ اولیاء اللہ کے خلاف بھی گستاخی کرنے لگے ہیں۔
انہوں نے کہا کہ 'مسلمان خود پر ہونے والے مظالم برداشت کر سکتا ہے لیکن اولیاء اللہ و بزرگان دین کے خلاف گستاخی برداشت نہیں کر سکتا'۔
مولانا قادر محی الدین قادری نے تمام مکاتب فکر کے علماء سے درخواست کی کہ وہ فرقہ پرست نیوز چینلز پر جا کر اسلام اور صوفیاء کے خلاف نفرت پھیلانے کی سازش کو ناکام بنائیں۔