سیکریٹریٹ میں مساجد کی تعمیر سے متعلق تلنگانہ حکومت وضاحت کرے: جمعیت علما

حافظ پیر شبیر احمد نے حکومت کو انتباہ دیا کہ حکومت دس دن کے اندر مساجد کی تعمیر سے متعلق وضاحت کرے، ورنہ جمعیت علما ریاست بھر میں احتجاج منظم کرے گی۔

تلنگانہ سیکریٹریٹ کی دو مساجد کے انہدام کے بعد وزیراعلی چندر شیکھر راؤ نے ماہ اکتوبر2020 میں سیکریٹریٹ کی دو مساجد تعمیر کرنے کا تیقن دیا تھا۔

اس ضمن میں جمعیت علما آندھرا و تلنگانہ کے صدر حافظ پیر شبیر احمد نے کہا کہ وزیراعلی کے چندر شیکھر راو نے علماء، مشائخ اور مسلم رہنماوں سے وعدہ کیا تھا کہ ماہ اکتوبر میں دونوں مساجد تعمیر کی جائیں گی۔ دو ماہ گزر چکے ہیں لیکن ابھی تک مسجد کا سنگ بنیاد نہیں رکھا گیا۔

ماہ اکتوبر میں مسلم رہنماوں نے مساجد کا سنگ بنیاد رکھنے کی اپیل کی تو حکومت کے نمائندوں نے کہا کہ بلدی انتخابات کے بعد مساجد تعمیر کی جائیں گی- اب انتخابات ختم ہو چکے ہیں لیکن مساجد کی تعمیر کا کام شروع نہیں کیا جارہا ہے۔

اس موقع پر حافظ پیر شبیر نے حکومت کو انتباہ دیتے ہوئے کہا کہ حکومت دس دن کے اندر مساجد کی تعمیر سے متعلق وضاحت کرے و دیگر صورت جمعیت علما ریاست بھر میں احتجاج منظم کرے گی۔

حکومت تلنگانہ نے سیکریٹریٹ کی ازسر نو تعمیر کے لیے اس عمارت کو منہدم کر دیا جس میں دو مساجد کو بھی شہید کر دیا گیا۔