تلنگانہ میں معاشی ترقی کی شرح میں اضافہ: ہریش راو

ہریش راو نے کہا کہ ملک نے گزشتہ چھ برس کے دوران سات فیصد کی شرح ترقی کی ہے جب کہ تلنگانہ نے ملک سے تین فیصد زیادہ شرح ترقی کے نشانہ کو حاصل کیا ہے۔

تلنگانہ کے وزیرخزانہ ہریش راو نے کہا ہے کہ ریاست نے گزشتہ چھ برسوں کے دوران 11.5فیصد معاشی ترقی درج کی ہے۔

انہوں نے ریاست میں گزشتہ سات برسوں کے دوران معاشی صورتحال پر میڈیا سے بات کرتے ہوئے کہا کہ ملک نے گزشتہ چھ برسوں کے دوران سات فیصد کی شرح ترقی کی ہے جب کہ تلنگانہ نے ملک سے تین فیصد زیادہ شرح ترقی کے نشانہ کو حاصل کیا ہے۔

انہوں نے کہاکہ وزیراعلی کے چندرشیکھرراو کی پالیسیوں کی وجہ سے یہ ممکن ہوسکا۔انہوں نے بی جے پی پر نکتہ چینی کرتے ہوئے کہا کہ ملک کی معاشی ترقی بنگلہ دیش سے بھی کم ہے۔انہوں نے دعوی کیا کہ تلنگانہ ریاست نے کورونا کے عرصہ کے دوران بھی مثبت شرح ترقی حاصل کی ہے۔

وزیر موصوف نے کہا کہ ریاست نے فی کس آمدنی کے معاملہ میں بھی ترقی کی ہے۔انہوں نے کہاکہ ریاست نے فی کس آمدنی کے معاملہ میں بھی ترقی کی ہے جو ملک کی فی کس آمدنی سے 1.84گنازیادہ ہے۔

ہریش راو نے خیال ظاہر کیا کہ تلنگانہ،ملک میں فی کس آمدنی کے معاملہ میں تیسرے مقام پر ہے۔اس کا مقام 2014میں دسواں تھا۔انہوں نے کہاکہ ریاست کی فی کس آمدنی گزشتہ چھ برسوں کے دوران دوگنی ہوگئی ہے۔انہوں نے ان حقائق پر مرکزی وزیر کشن ریڈی سے جواب دینے کی خواہش کی۔

یواین آئی