کے ٹی آر نے اُپل کے این ایس ایل ایرئینا میں صنعتی پارکس کو آئی ٹی پارکس میں تبدیل کرنے کی منظوری کے مکتوبات حوالے کرنے کے موقع پر خطاب کرتے ہوئے کہا کہ حکومت جلد ہی حیدرآباد گروپس ان ڈسپرشن پالیسی تیار کرے گی تاکہ شہر کے مشرقی علاقہ کی سمت زیادہ سے زیادہ سرمایہ کاری کے مواقع کی طرف راغب کیاجاسکے۔
انہوں نے کہا کہ اس پالیسی کو کابینہ کی منظوری کا انتظار ہے۔ اس کے ذریعہ حیدرآباد کی ترقی کو یقینی بنایاجاسکے۔انہوں نے کہاکہ حکومت مناسب انفراسٹرکچر کے ساتھ روزگار کے مواقع میں اضافہ کرے گی اور ساتھ ہی رہائشی مواقع میں بھی اضافہ کیاجائے گا۔
شہر کا مشرقی علاقہ اُپل اور اطراف کے علاقہ پر مشتمل ہے جس میں پہلے ہی جین پیاکٹ اور انفوسس جیسی کمپنیاں کام کررہی ہیں۔ ساتھ ہی اس علاقہ میں کئی چھوٹی، اوسط اور بڑی کمپیناں بھی کام کررہی ہیں۔ اس قدم سے حیدرآباد کے اس علاقہ میں سرمایہ کاری کے مزید مواقع پیداہوں گے۔کے تارک راما راو نے کہا کہ میٹرو ریل سے معاشی سرگرمیوں میں اضافہ ہوا ہے۔
ریاستی وزیر نے کہا کہ مختلف شراکت داروں کے ساتھ جائزہ اجلاس منعقد کیاجائے گاتاکہ شہر کے اس مشرقی علاقہ کی ضروریات کا خیال رکھاجاسکے۔ اُپل اور ناراپلی کے درمیان ایک اسکائی واک اور عنبرپیٹ سے رامنتاپور کے درمیان ایک فلائی اوور کی تعمیر کا کام کیا جائے گا۔ انہوں نے زور دیتے ہوئے کہا کہ آئی ٹی کے شعبہ میں حیدرآباد ترقی کررہا ہے۔
ایم ایم ٹی ایس خدمات رائے گری تک چلائی جائیں گی جس سے مشرقی راہداری تک روزگار کے مواقع کے امکانات پیداہوں گے۔ وزیر اعلی کے چندر شیکھرراو نے مختلف محکمہ جات کو ہدایت دی کہ وہ حیدرآباد میں انفراسٹرکچر کے کام انجام دیں تاکہ اس کی ہمہ گیر ترقی کو یقینی بنایاجاسکے۔ انہوں نے کہا کہ آلودگی والی صنعتیں آوٹر رنگ روڈ علاقہ سے ہٹائی جائیں گی۔
