ریاست تلنگانہ کے دارالحکومت حیدرآباد کی رضاکارانہ تنظیم کی رکن ماریہ تبسم نے لاک ڈاؤن کے دوران مختلف طریقوں سے عوام کی مدد کی۔
انہوں نے ای ٹی وی بھارت کو تفصیلات بتاتے ہوئے کہا کہ 'کورونا کے ابتدائی دنوں سے ہی وہ عوام کے درمیان ہیں اور ایسے وقت میں انہوں نے کورونا کے خلاف جدوجہد کرنے والے سرکاری عملے کو پی پی ای کٹس فراہم کیں نیز عوام میں ماسک اور سینیٹائیز تقسیم کرتے ہوئے کورونا کے متعلق شعور بیداری کی مہم چلائی۔
شہریت ترمیمی قانون کے خلاف تحریک کے سبب تین ایف آئی آر درج کئے جانے اور لاک ڈاؤن تک گھر پر پولیس کی تعیناتی کے باوجود خود کو عوام کی خدمت کے لیے وقف کرنے والی خاتون خالدہ پروین نے لاک ڈاؤن کے دوران ان کے سامنے آنے والے درد ناک واقعات سے ای ٹی وی بھارت کو واقف کروایا۔
خالدہ پروین نے کہا کہ لاک ڈاؤن میں بھوک کی وجہ سے انہیں تین کالز ایسی موصول ہوئیں جس میں کال کرنے والوں نے کھانا نہ ہونے کی وجہ سے خود کشی کا ارادہ ظاہر کیا۔
انہوں نے بتایا کہ دو وقت کے کھانے کے لیے کسی کی خودکشی کا ارادہ انسان کو جھنجھوڑنے کے لیے کافی ہے اس سے ظاہر ہوتا ہے کہ انسان کی ضروریات کافی محدود ہیں۔
