رواں برس حج 2020 ہونے کا امکان

تلنگانہ حج کمیٹی کے چیئرمین محمد مسیح اللہ خان نے میڈیا سے بات کرتے ہوئے کہا کہ تا حال حج 2020 کی منسوخی کا نہ ہی سعودی حکام نے اور نہ ہی حج کمیٹی آف انڈیا نے اعلان کیا ہے۔

محمد مسیح اللہ خان نے حج کی منسوخی کے تعلق سے افواہیں پھیلانے والوں کو سخت انتباہ دیا کہ وہ گمراہ کن خبریں پھیلاتے ہوئے منتظر عازمین حج میں الجھن پیدا نہ کریں بصورت دیگر حج کمیٹی سخت قانونی کارروائی کرے گی کیونکہ سعودی حکومت کی جانب سے ہنوز ایسی کوئی اطلاع نہیں موصول ہوئی ہے کہ حج 2020 منسوخ کیا جانے والا ہے۔

انہوں نے کہا کہ بالفرض کورونا وائرس کی سنگین نوعیت کو دیکھتے ہوئے سعودی حکام حج 2020 منسوخ بھی کرتے ہیں تو اس کی اطلاع متعلقہ عازمین کو دے دی جائے گی اور جن عازمین نے جو رقم ادا کی ہے وہ انہیں لوٹادی جائے گی، عازمین حج کو اس سلسلے میں فکرمند ہونے کی ضرورت نہیں ہے۔

محمد مسیح اللہ خان نے یہ بھی کہا کہ سینٹرل حج کمیٹی نے 21 دن کے لاک آوٹ کے پیش نظر دوسری اور تیسری قسط ایک ساتھ ادا کرنے کی سہولت بھی دی ہے۔

مسیح اللہ خان نے ضلعی حج کمیٹیوں سے اپیل کی ہے کہ وہ آئندہ اعلان تک حج سے متعلق سے تربیتی کیمپ منعقد نہ کریں۔