تلنگانہ: آر ٹی سی بس درخت سے ٹکرائی، آٹھ مسافر زخمی

تلنگانہ کے ضلع کاماریڈی کے قریب آر ٹی سی بس کا بریک فیل ہونے کے نتیجہ میں بس درخت سے ٹکرا گئی۔ اس حادثہ میں بس کے 8 مسافر زخمی ہوگئے۔

یہ حادثہ تلنگانہ کے ضلع کاماریڈی کے پٹلم منڈل کے نواحی علاقہ برہمن پلی دیہات کے قریب اُس وقت پیش آیا جب بس کا بریک فیل ہوگیا، جس کے نتیجہ میں ڈرائیور نے اپنا توازن کھو دیا اور بس درخت سے ٹکرا گئی۔ اس بس میں 48 مسافر سوار تھے جو پٹلم سے بانسواڑہ کی سمت جا رہی تھی۔
اس حادثہ کی اطلاع ملتے ہی پولیس وہاں پہنچی جس نے زخمیوں کو علاج کے لیے ہسپتال منتقل کیا۔ پولیس نے اس سلسلہ میں ایک معاملہ درج کرکے جانچ شروع کر دی ہے۔