’غریب عوام کو لاٹھی کی نہیں، رحم کی ضرورت‘

حیدرآباد سٹی پولیس کمشنر انجنی کمار نے پولیس عملے کو غریب عوام پر رحم کرنے اور ان پر لاٹھیاں نہ برسانے کی تاکید کی-

انجنی کمار نے پولیس کے نام ایک ویڈیو پیغام جاری کرتے ہوئے کہا کہ "اس موقع پر مجبور عوام کو آپ کے رحمدلی کی ضرورت ہے نہ کہ آپ کی لاٹھیوں کی، میں آپ سے اپیل کرتا ہوں کہ آپ انہیں لاٹھی نہ دکھائیں ان کی مدد کےلیے آگے آئیں اور ممکنہ حد تک ان کو مدد پہنچائیں، اگر ہم ایک بھوکے کو لاٹھی دکھائیں گے تو یہ یقیناً تکلیف دہ ہے"۔

انہوں نے مزید کہا کہ اگر کورونا ایک بحران ہے تو ایک سنہری موقع بھی ہے اس کا فائدہ اٹھاتے ہوئے ہم عوام کو بتاسکتے ہیں کہ پولیس کے سینے میں بھی ایک دل ہے جو غریب کی مدد کے لیے تیار رہتا ہے۔

انجنی کمار نے 22 اپریل کو میر چوک پولیس کی جانب سے لاک ڈاؤن کی خلاف ورزی کے نام پر آٹو ڈرائیور کے خلاف کاروائی کئے جانے کا ویڈیو کا حوالہ دیتے ہوئے بتایا کہ اس ویڈیو میں ایک آٹو ڈرائیور کو جو اپنے بچوں کےلیے کھانے کا انتظام کرنے نکلا تھا پولیس نے اس کے خلاف کاروائی کی جس پر وہ برہم ہوکر اس نے خود اپنا آٹو تہس نہس کردیا جس سے اس کے دل کا درد واضح ہوتا ہے۔

کمشنر پولیس نے بتایا کہ چند پولیس افسروں کی اس طرح کی کاروائیوں سے پورے محکمے پر انگلی اٹھائی جاتی ہے جس سے پولیس کے اچھے کارنامے بھی ضائع ہوجاتے ہیں ہیں۔ ہمیں ان غریبوں کو یہ اعتماد دلانے کی ضرورت ہے کہ پولیس ان کی بہتری کےلیے کام کر رہی ہے۔

لاک ڈاؤن کے دوران پولیس کی کارکردگی کی ستائش کرتے ہوئے انہوں نے بتایا کہ اس موقع پر پولیس کے افسروں نے کئی ایک بہترین کارنامے انجام دئیے ہیں، کئی عہدیداروں نے حاملہ خواتین کو بر وقت اسپتال پہنچا کر ان کی مدد کی جس سے عوام میں محکمے کے متعلق اعتماد میں اضافہ ہوا ہے۔

لاک ڈاؤن میں پولیس عملے کی جانب سے کی گئی بہترین کاکردگی کی ستائش کرتے ہوئے کمشنر نے ان سے اظہار تشکر کیا اور بتایا کہ انہیں اپنے عملے پر فخر ہے جو گزشتہ ایک ماہ سے اپنے خاندانوں سے دور رہ کر عوام کی خدمت میں مصروف ہیں۔ تاریخ میں جب بھی 2020 لاک ڈاؤن کا ذکر آئے گا تب عوام پولیس کے اس کارنامے کا فخر یہ ذکر کریں گے۔