پرکاش جاوڈیکر نے ٹی آر ایس اور مجلس کو بنایا تنقید کا نشانہ

مرکزی وزیر پرکاش جاوڈیکر نے تلنگانہ حکومت پر تنقید کرتے ہوئے کہا کہ وزیراعلیٰ کے چندر شیکھر راؤ اور ان کے دوستوں کے اثاثہ جات میں زبردست اضافہ ہو رہا ہے جبکہ حکومت کے اثاثے کم ہو رہے ہیں۔

پرکاش جاوڈیکر نے بتایا کہ بی جے پی کی جانب سے ایک ’آروپ پترا‘ کو جاری کیا جائے گا جس میں گذشتہ 6 برسوں کے دوران ریاستی حکومت کی 60 ناکامیوں کی نشاندہی کی گئی ہے۔ انہوں نے کہا کہ ’کے سی آر اور ان کے دوستوں کے اثاثہ جات میں اضافہ ہورہا ہے لیکن تلنگانہ کے اثاثے کم ہورہے ہیں۔

مرکزی وزیر نے کہا کہ بی جے پی نے گذشتہ 6 سالوں کے دوران ریاستی حکومت کی 60 ناکامیوں کو پیش کرتے ہوئے آروپ پتر جاری کیا ہے۔ جاوڈیکر نے جی ایچ ایم سی انتخابات میں بی جے پی کی امکانی کامیابی پر اعتماد کا اظہار کیا۔

انہوں نے مجلس اتحادالمسلمین پر بھی تنقید کی اور کہا کہ ایم آئی ایم کو ووٹ دینا کا مطلب تقسیم کےلیے ووٹ دینا ہوگا۔ انہوں نے کہا کہ دوباک ضمنی انتخاب کے نتائج کو بی جے پی حیدرآباد میں دہرائیگی۔

جاوڈیکر نے کہا کہ ’ہمیں فیصلہ کرنا ہے کہ ہم بی جے پی کا میئر چاہتے ہیں یا ایم آئی ایم کا؟ انہوں نے مزید کہا کہ ٹی آر ایس اور کانگریس کو ووٹ دینے کا مطلب مجلس کو ووٹ دینے کے مترادف ہوگا اور ایم آئی ایم کو ووٹ دینے کا مطلب تقسیم کے لیے ووٹ دینے ہوگا۔

گریٹر حیدرآباد میونسپل کارپوریشن کے انتخابات یکم دسمبر کو منتعقد ہوں گے اور کارپوریشن میں 150 وارڈز ہیں۔ انتخابات کے نتائج کا اعلان 4 دسمبر کو ہوگا۔