کورونا وائرس سمیت کئی امور پر تمل ناڈو حکومت کی میٹنگ

تمل ناڈو کابینہ نے کورونا وائرس سے نپٹنے اور اپنے آخری بجٹ سمیت کئی اہم امور پر تبادلہ خیال کیا۔

ریاست تمل ناڈو کے وزیر اعلی ای کے پلانی سوامی کی صدارت میں سکریٹریٹ میں تقریباَ دو گھنٹے تک میٹنگ چلی۔ اس برس کابینہ کی یہ دوسری میٹنگ تھی۔

ذرائع نے بتایا کہ میٹنگ میں خاص طور پر کورونا وائرس سے نپٹنے کے لیے کی گئی تیاریوں پر تبادلہ خیال ہوا ہے۔

اس کے علاوہ مارچ میں اسمبلی میں پیش کیے جانے والے بجٹ پر بھی بات چیت ہوئی۔ چونکہ سنہ 2021 میں اسمبلی انتخابات ہونے ہیں، اس وجہ سے یہ آخری مکمل بجٹ ہوگا۔ بجٹ میں ہر طبقہ کو لبھانے والے کئی اعلانات کیے جانے کی امید ہے۔

میٹنگ میں ریاست میں مختلف صنعتوں کو صنعت لگانے کی اجازت دینے پر بھی تبادلہ خیال ہوا۔ اس کے علاوہ شہری علاقوں میں زیر التوا بلدیاتی انتخابات کرانے پر بھی بات چیت کی گئی۔