پوری: اسرائیل اور فلسطین کے درمیان جنگ جاری ہے۔ جس میں دوطرفہ کاروائی کے دوران ایک ہزار سے زائد افراد ہلاک ہوچکے ہیں جبکہ ہزاروں افراد زخمی ہوئے ہیں۔ اسی معاملے پر ملک کے مشہور و معروف سینڈ آرٹسٹ پدم شری ایوارڈ یافتہ سدرشن پٹنائیک نے اپنے آرٹ سے دونوں ممالک سے امن کی اپیل کی ہے۔
دونوں کے درمیان جنگ کو روکنے اور امن قائم کرنے کے لیے سدرشن پٹنائک نے پوری گولڈن سی بیچ میں سینڈ آرٹ کے ذریعے اپیل کی ہے۔ سدرشن پٹنائک نے جنگ میں مارے گئے متاثرین کے اہل خانہ کے تئیں گہری تعزیت کا اظہار کیا۔ سدرشن نے اپنے سینڈ آرٹ میں دونوں قوموں کے لیے امن و سلامتی کی دعا کے ساتھ ساتھ انسانیت کے ساتھ یکجہتی کا پیغام بھی لکھا۔ انہوں نے اپنے اس منفرد فن سے نہ صرف اسرائیل فلسطین بلکہ پوری دنیا کو امن اور انسانیت کے ساتھ یکجہتی کا اظہار کرنے کا پیغام دیا ہے اور اس آرٹ میں انہوں نے صرف انسانیت اور امن کا ذکر کیا۔