Hate Speeches Against Sanatan Dharam ادھے نیدھی اور اے راجہ کے خلاف سپریم کورٹ میں عرضی دائر، ایف آئی آر درج کرنے کا مطالبہ

سپریم کورٹ میں ایک عرضی دائر کی گئی ہے جس میں تمل ناڈو کے وزیر اعلی ایم کے اسٹالن کے بیٹے ادھے نیدھی اسٹالن اور ڈی ایم کے ایم پی اے راجہ کے خلاف سناتن دھرم پر متنازع بیان دینے پر قانونی کارروائی کی درخواست کی گئی ہے۔ وکیل ونیت جندال کی طرف سے دائر درخواست میں کہا گیا ہے کہ ہندو اور سناتن دھرم کے پیروکار ہونے کے ناطے درخواست گزار کے مذہبی جذبات مجروح ہوئے ہیں۔

نئی دہلی: سپریم کورٹ میں ایک عرضی دائر کی گئی ہے جس میں تمل ناڈو کے وزیر اعلی ایم کے اسٹالن کے بیٹے ادھے نیدھی اسٹالن اور ڈی ایم کے ایم پی کے راجہ کے خلاف قانونی کارروائی شروع کرنے کا مطالبہ کیا گیا ہے۔ وکیل ونیت جندال نے سپریم کورٹ میں عرضی داخل کرتے ہوئے کہا کہ وہ سناتن دھرم کے پیروکار ہیں اور اسٹالن جونیئر کی طرف سے دی گئی نفرت انگیز تقریر سے ان جذبات مجروح ہوئے ہیں۔ درخواست میں یہ بھی کہا گیا ہے کہ درخواست دہندہ نے دہلی پولیس کمشنر کے پاس پہلے ہی شکایت درج کرائی ہے جس میں ڈی ایم کے لیڈر کے خلاف تعزیری دفعات کے تحت کارروائی کی درخواست کی گئی ہے، لیکن ابھی تک فرسٹ انفارمیشن رپورٹ (ایف آئی آر) تک درج نہیں کی گئی ہے۔

وکیل آر کے چودھری کے ذریعے دائر کی گئی درخواست میں عدالت عظمیٰ کے رہنما خطوط پر عمل درآمد نہ کرنے پر دہلی پولیس کے خلاف توہین عدالت کی بھی درخواست دائر کی گئی ہے۔سپریم کورٹ نے کہا تھا کہ انتظامیہ کی جانب سے انتہائی سنگین مسائل پر کارروائی کرنے میں کوئی تاخیر توہین عدالت کے زمرے میں آئے گی، کیونکہ ملک کے سیکولر کردار کو بچانے کے لیے کارروائی کی ضرورت ہے۔ درخواست میں الزام لگایا گیا ہے کہ ادھے نیدھی اسٹالن کی تقریر سے مذہبی جذبات کو ٹھیس پہنچی ہے، ہندو مذہب کے پیروکاروں کی توہین ہوئی اور مذہب کی بنیاد پر مختلف گروہوں کے درمیان دشمنی کو ہوا دی گئی۔

قابل ذکر ہے کہ اس سے قبل ہائی کورٹ کے سابق ججز اور ریٹائر بیوروکریٹس نے چیف جسٹس آف انڈیا کو خط لکھ کر ان سے درخواست کی تھی کہ وہ تمل ناڈو کے وزیر کی طرف سے کی گئی مبینہ نفرت انگیز تقریر کا از خود نوٹس لیں۔ قابل ذکر ہے کہ ادھے نیدھی اسٹالن نے تمل ناڈو میں ایک پروگرام میں خطاب کرتے ہوئے کہا تھا کہ سناتن دھرم کو مچھر، ڈینگو، ملیریا یا کورونا کی طرح ختم کرنا ہوگا۔ کیونکہ یہ لوگوں کو ذاتوں میں تقسیم کرتا ہے اور امتیازی سلوک کو فروغ دیتا ہے۔

وہیں اے راجہ کے خلاف دائر درخواست میں کہا گیا ہے کہ وہ راجیہ سبھا کے رکن ہیں اور بھارت کے ایک سابق کابینہ وزیر نے سناتن دھرم کے خلاف اسٹالن کے تضحیک آمیز ریمارکس کو مزید تضحیک آمیز انداز میں بیان کیا ہے۔ جس میں ڈی ایم کے لیڈر نے مبینہ طور پر کہا تھا کہ سناتن دھرم کا موازنہ ایڈز اور جذام جیسی بیماریوں سے کیا جانا چاہیے، جن کے ساتھ سماجی بدنامی جڑی ہوئی ہے۔