پولیس انسپکٹر کی جسد خاکی سرینگر پہنچائی گئی، پولیس لائنز میں گلباری تقریب منعقد

اکتوبر کی 29تاریخ کو عسکری حملہ میں زخمی ہوئے پولیس انسپکٹر مسرور احمد وانی کی جسد خاکی دہلی سے سرینگر پہنچائی گئی اور پولیس لائنز میں ایک گلباری کی تقریب منعقد کی گئی۔ Police Inspector masroor ahmad wani wreath laying ceremony

سرینگر (جموں و کشمیر): جموں و کشمیر کی گرمائی راجدھانی سرینگر میں واقع ڈسٹرکٹ پولیس لائنز (ڈی پی ایل) میں ریاستی پولیس کے انسپکٹر مسرور احمد وانی کو خراج پیش کرتے ہوئے گلباری کی تقریب منعقد کی گئی۔ سرینگر کے عیدگاہ علاقے میں عسکریت پسندوں کے حملے میں زخمی ہونے کے ایک ماہ سے زائد عرصے کے بعد جمعرات کو مسرور وانی دہلی کے آل انڈیا انسٹی ٹیوٹ آف میڈیکل سائنسز (ایمس) میں زخموں کی تاب نہ لاتے ہوئے فوت ہوگئے۔ پولیس انسپکٹر کی گلباری تقریب میں ایڈیشنل ڈائرکٹر جنرل آف پولیس (لا اینڈ آرڈر) وجے کمار، انسپکٹر جنرل آف پولیس کشمیر وی کے بردی، ڈویژنل کمشنر کشمیر وجے کمار بدھوری اور کمشنر سرینگر میونسپل کارپوریشن اطہر عامر خان سمیت اعلیٰ پولیس، سیول افسران اور وانی کے رشتہ داروں نے شرکت کی۔ انہوں نے نم آنکھوں کے ساتھ وانی کے تابوت پر پھول چڑھائے۔

مسرور وانی جمعرات کو زخموں کی تاب نہ لاتے ہوئے دہلی کے ایمز میں دم توڑ گئے۔ انہوں محض ایک دن قبل ہی بذریعہ طیارہ سرینگر سے دہلی ریفر کیا گیا تھا۔ یاد رہے کہ وانی کو 29 اکتوبر کو سرینگر کے عیدگاہ علاقے میں اُس وقت عسکریت پسندوں نے نزدیک سے گولی ماری جب وہ کرکٹ کھیل رہے تھے۔ زخمی ہونے کے بعد انہیں سکمز صورہ منتقل کر دیا گیا تھا، جہاں سے انہیں ایک نجی اسپتال میں بھرتی کیا گیا تھا۔

گلباری کی تقریب کے بعد ایڈیشنل ڈائرکٹر جنرل آف پولیس (لا اینڈ آرڈر) وجے کمار نے صحافیوں سے بات کرتے ہوئے کہا کہ ’’این آئی اے اور جموں و کشمیر پولیس مشترکہ طور پر معاملے کی تحقیقات کر رہی ہے۔ ملوث افراد کو جلد ہلاک یا گرفتار کر لیا جائے گا۔ جاری تحقیقات کے بارے میں حقائق سامنے لانے کا یہ مناسب وقت نہیں ہے۔‘‘

کمار نے اعتراف کرتے ہوئے کہ ممکنہ عسکریت پسندوں کے حملے کے بارے میں ایک خفیہ اطلاع موصول ہوئی تھی: ’’ہمارے پاس ان پٹ تھے، لیکن بدقسمتی سے بعض اوقات غلطیاں ہو جاتی ہیں اور اس معاملے میں ہم نے ایک افسر کو کھو دیا۔ تاہم مستقبل میں ایسے حملوں سے بچنے کے لیے ایک فول پروف میکنزم بنایا گیا ہے۔ مزید برآں، تمام افسران اور اہلکاروں کو تازہ ہدایات جاری کی گئی ہیں کہ وہ چھٹی پر یا ڈیوٹی پر ہوتے ہوئے ایس او پیز پر مکمل عمل کریں۔ یہ ہدایات اس لیے دی گئی ہیں تاکہ ہمارے اہلکار سوفٹ ٹارگٹ نہ بنیں۔‘‘