نامور فری سٹائل فٹبالر اگوسکا اور پٹرک نے کشمیر میں فٹبال کے حیرت انگیز کرتب دکھائے

World Famous Freestyle footballers In Kashmir نامور فری سٹائل فٹ بالر اگوسکا اور پٹرک نے پیر کے روز سرینگر کے لال چوک میں اپنے حیرت انگیز ہنر کا مظاہرہ کرکے وہاں موجود شائقین کے دل موہ لئے۔اس سے قبل انہوں نے ڈل جھیل، مغل باغات میں بھی اپنے ہنر کا مظاہرہ کیا ہے۔

سرینگر :دنیا بھر میں اپنی حیرت انگیز فٹبال کرتب کے لیے مشہور فری سٹائل فٹ بالر جوڑی اگوسکا اور پٹرک بوور اس وقت جموں و کشمیر کی گرمائی راجدھانی سرینگر میں ہیں۔ دونوں نے اپنے حیرت انگیز ہنر کا مظاہرہ کرکے شائقین کے دل موہ لئے۔جہاں پٹرک چار بار عالمی ریکارڈ اپنے نام کر چکے ہیں وہیں اُن کی فری اسٹائل ساتھی اگوسکا پانچ بار ورلڈ چیمپیئن اور دو بار یوروپیئن چیمپئن بن چکی ہیں۔ اس کے علاوہ اگسکا گنیز ورلڈ ریکارڈز میں بھی اپنا نام درج کرا چکی ہیں۔

پیر کے روز شہرہ آفاق جھیل ڈل کے کنارے اور تاریخی گھنٹہ گھر کے نزدیک معروف فری اسٹائل فٹ بالر اگوسکا اور پٹرک نے اپنے ہنر دکھا کر سامعین کے دل جیت لئے۔نامور فری سٹائل فٹ بالروں نے اپنے پیشہ وارانہ صلاحیتوں کا بھر پور مظاہرہ کرکے وہاں پر موجود فٹبال شائقین کے سامنے کرتب بازی کا مظاہرہ کرتے ہوئے انہیں حیرت میں ڈال دیا۔
اس موقع پر فٹبال شائقین نے کہا کہ اگوسکا اور پٹرک نے فٹبال کے ساتھ جو کرتب بازی کا مظاہرہ کیا اس سے وہاں موجود لوگوں پر سحر طاری ہو گیا۔
واضح رہے کہ وادی کشمیر میں تازہ برف باری کے بعد ملکی اور غیر ملکی سیاحوں کے ساتھ ساتھ فلم ستاروں اورنامور کھلاڑیوں کی آمد کا سلسلہ بڑے پیمانے پر جاری ہے۔

بتادیں کہ نامور فٹ بالر اس وقت وادی کشمیر میں موجود ہیں اور وہ مختلف علاقوں میں جاکر تماشائیوں کی داد حاصل کر رہے ہیں۔سرینگر کے بعد یہ جوڑی بھارت کی راجدھانی دہلی جا رہے ہیں، پھر گلابی شہر جئے پور، اس کے بعد تجارتی راجدھانی ممبئی اور پھر آخر میں بنگلور جائے گے۔
سرینگر میں اگسکا اور پٹرک کے فٹبال کے ساتھ کرتب کرتے ہوئے ویڈیوز کافی وائرل ہوئے ہیں اور یہ ویڈیوز لوگوں کو کافی پسند بھی آرہے ہیں۔ نشاط باغ، جھیل ڈل کے کنارے اور یہاں تک کی شکار میں بھی اس جوڑی نے فٹبال کے حیران کن کرتب کیے ہیں۔