وادئ کشمیر میں 15 مارچ تک بارش اور برفباری کا الرٹ

اس دوران خراب موسم کی وجہ سے سرینگر- جموں اور لیہہ قومی شاہراہ لینڈ سلائڈز کی وجہ سے متاثر ہوسکتی ہے۔

محکمہء موسمیات نے وادی کشمیر میں 15 مارچ تک موسم خراب رہنے کی پیش گوئی کی ہے۔ محکمہ موسمیات نے کہا ہے کہ 15 مارچ تک وادی کے تمام میدانی علاقوں میں وقفہ وقفہ سے بارش جبکہ بالائی علاقوں میں ہلکی برفباری کا امکان ہے۔

محکمہ موسمیات جموں و کشمیر کے ڈائریکٹر سونم لوٹس نے 15 مارچ تک وادی میں موسم خراب رہنے کے امکانات ظاہر کئے ہیں۔

انہوں نے کہا ہے کہ 15 مارچ تک کشمیر وادی میں موسم کی صورتحال غیر متوقع ہے اور میدانی علاقوں میں بارش کے علاوہ بالائی علاقوں میں برف باری کے امکانات ہیں۔ انہوں نے کہا ہے کہ 11 سے 15 دنوں کے دوران بارش کے زیادہ امکانات ہیں۔

ادھر خراب موسم کی وجہ سے سرینگر جموں قومی شاہراہ پر لینڈ سلائڈز کی وجہ سے بانیہال سے رامبن کے درمیان راستہ بند ہو سکتا ہے۔ اس کے علاوہ لیہہ قومی شاہراہ بھی متاثر ہوسکتی ہے۔

سونم لوٹس نے کاشتکاروں کو مشورہ دیا ہے کہ وہ 15 مارچ تک باغات اور دیگر کھیتوں میں ادویات چھڑکنے سے بھی گریز کریں کیونکہ اس دوران گرج چمک کے ساتھ ساتھ بارش ہونے کا امکانات زیادہ ہیں۔