کورونا وائرس: جموں و کشمیر میں رواں سال کے سب سے زیادہ 2381 نئے معاملات

اسٹیٹ ایگزیکیوٹیو کمیٹی نے جموں و کشمیر میں موجودہ کووڈ صورتحال کے پیش نظر ڈیزاسٹر مینجمنٹ ایکٹ 2005 کی دفعہ 24 کے تحت تمام پیڈ پبلک پارکس کو اگلے احکامات تک بند کرنے کے احکامات جاری کئے ہیں۔

جموں و کشمیر میں گذشتہ چوبیس گھنٹوں کے دوران کورونا وائرس کے 2381 نئے معاملات سامنے آئے ہیں نیز اس وبا سے متاثر 21 افراد ہلاک ہوئے ہیں۔ یہ جموں و کشمیر میں رواں برس کسی ایک دن میں سامنے آنے والے سب سے زیادہ معاملات اور اموات ہیں۔

دریں اثنا انتظامیہ نے جموں و کشمیر میں سبھی پیڈ پبلک پارکس کو اگلے احکامات تک بند کرنے کے احکامات جاری کر دیے ہیں۔

سرکاری ذرائع نے بتایا کہ اسٹیٹ ایگزیکیوٹیو کمیٹی نے جموں و کشمیر میں موجودہ کووڈ صورتحال کے پیش نظر ڈیزاسٹر مینجمنٹ ایکٹ 2005 کی دفعہ 24 کے تحت تمام پیڈ پبلک پارکس کو اگلے احکامات تک بند کرنے کے احکامات جاری کئے ہیں۔ انہوں نے مزید بتایا کہ ان احکامات کا اطلاق آج سے ہی ہوگا۔

ایک سرکاری ترجمان نے کورونا کی صورتحال کے متعلق تفصیلات فراہم کرتے ہوئے کہا کہ پچھلے چوبیس گھنٹوں کے دوران کورونا وائرس کے 2381 نئے مثبت معاملات سامنے آئے ہیں جن میں سے 1533 کا تعلق کشمیر صوبے سے اور 848 کا تعلق جموں صوبے سے ہیں اور اس طرح اب تک سامنے آنے والے مثبت معاملات کی تعداد 1,60,755 تک پہنچ گئی ہے۔

انہوں نے بتایا کہ اسی مدت کے دوران 21 کووڈ مریضوں کی موت واقع ہوئی ہے جن میں 11 کا تعلق صوبہ جموں اور 10 کا تعلق کشمیر صوبہ سے ہیں۔

حکومت کی طرف سے جاری کئے گئے روزانہ میڈیا بلیٹن میں بتایا گیا ہے کہ جموں و کشمیر میں اب تک نوول کورونا وائرس کے 1,60,755 معاملات سامنے آئے ہیں جن میں سے 19,558 سرگرم معاملات ہیں۔ اب تک 1,39,050 افراد صحتیاب ہوئے ہیں۔

جموں وکشمیر میں کوروناوائرس سے مرنے والوں کی مجموعی تعداد 2,147 تک پہنچ گئی ہے جن میں سے 1,333 کا تعلق کشمیر صوبہ سے اور 814 کا تعلق جموں صوبہ سے ہے۔

جموں و کشمیر میں گذشتہ چوبیس گھنٹوں کے دوران مزید 866 افراد شفایاب ہوئے ہیں جن میں جموں صوبے کے 227 افراد اور کشمیر صوبے کے 639 افراد شامل ہیں۔

بلیٹن میں مزید کہا گیا ہے کہ اب تک 70,46,228 ٹیسٹوں کے نتائج دستیاب ہوئے ہیں جن میں سے 25 اپریل 2021 کی شام تک 68,85,473 نمونوں کی رپورٹ منفی پائی گئی ہے۔

یو این آئی