سینڈیکیٹ کنارا بینک کی سرینگر شاخ بند

ایک ملازم کا کورونا ٹیسٹ مثبت آنے کے بعد منگل کے روز یہاں قائم سینڈیکیٹ کنارا بینک کی شاخ کو بند کر دیا گیا ہے۔

سرینگر کے ایکسچینج روڈ پر قائم بینک برانچ کے مین گیٹ پر چسپاں ایک نوٹس میں کہا گیا ہے کہ ایک ملازم کا ٹیسٹ مثبت آنے کی وجہ سے بینک کو بند کر دیا گیا ہے۔

نوٹس پر مزید کوئی تفصیلات نہیں دی گئی ہیں تاہم بینک ذرائع کا کہنا ہے کہ بینک کے ایک ملازم کا ٹیسٹ مثبت آنے پر باقی اسٹاف ممبران کو ٹیسٹ منفی آنے تک ہوم کورنٹائن میں جانے کو کہا گیا ہے۔

دریں اثنا بینک کے متعدد صارفین کو منگل کے روز اس وقت مایوسی ہوئی جب وہ اپنے اپنے کاموں کے نپٹارے کے لئے وہاں آئے ہوئے تھے لیکن بینک بند تھا۔

تاہم بینک کی اے ٹی ایم مشین کام کر رہی تھی اور صارفین کو اس مشین سے پیسے نکالتے ہوئے دیکھا گیا۔

قابل ذکر ہے کہ سینڈیکیٹ بینک اور کنارا بینک کے مدغم ہونے کے بعد صرف یہی ایک برانچ کام کر رہا تھا۔