سرینگر: رہنما خطوط کی خلاف ورزی، نجی ہسپتال انتظامیہ پر جرمانہ عائد

ڈسڑکٹ ڈیزاسٹر منیجمنٹ اتھارٹی سرینگر نے کووڈ 19 رہنما خطوط کی خلاف ورزی کرنے پر ایک نجی ہسپتال انتظامیہ پر 20ہزار روپے کا جرمانہ عائد کیا۔

ڈسڑکٹ ڈیزاسٹر منیجمنٹ اتھارٹی سرینگر کے چیئرمین کی ہدایت پر ایگزیکٹو مجسٹریٹ ساؤتھ کی سربراہی میں انتظامیہ کے اہلکاروں نے مگر مل باغ کے ایک نجی ہسپتال کا اچانک معائنہ کیا جہاں ہسپتال کے ویٹنگ ہال میں مریضوں کا بھاری رش دیکھا گیا۔ ہسپتال میں نہ تو سماجی دوری کا کو کوئی پاس و لحاظ دیکھا گیا اور نہ ہی وضع کیے گئے کورونا کے رہنما خطوط پر عمل در آمد ہوتے ہوئے پایا گیا۔

اس موقع پر محکمہ کے افسران نے ہسپتال انتظامیہ پر 20ہزار روپے کا جرمانہ عائد کیا اور ہسپتال انتظامیہ کو ہدایت دی گئی کہ وہ سختی کے ساتھ کووڈ 19رہنما خطوط پر عمل پیرا رہیں۔

افسران کا کہنا تھا کہ ’’جس طرح ہسپتال میں رہنما خطوط کی خلاف ورزیاں دیکھی گئیں، ہسپتال کو سر بمہر کیا گیا ہوتا لیکن وہاں بہت سارے مریض داخل تھے جن کا علاج جاری تھا۔‘‘

متعلقہ محکمے کے افسران نے کہا کہ آنے والے دنوں میں اچانک معائنہ کرنے کی مہم جاری رکھی جائے گا اور جہاں کہیں بھی اور جس کسی نجی ہسپتال میں کووڈ 19 کی خلاف ورزیاں پائی جائیں گی اس کے خلاف سخت سے سخت کارروائی عمل میں لائی جائے گی۔