سرینگر: شبانہ آتشزدگی میں کئی مکانات خاکستر

سرینگر میں گزشتہ شب ڈاؤن ٹاؤن میں کئی مکانات آگ لگنے سے خاکستر ہو گئے۔ تاہم اس واردات میں کسی جانی نقصان کی کوئی اطلاع نہیں ہے۔

سرینگر کے نواب بازار علاقے میں گزشتہ شب آگ کی واردات میں کم از کم 6 رہائشی مکانات خاکستر ہو گئے۔

ایک سرکاری عہدیدار نے بتایا کہ گزشتہ شب نواب بازار علاقے میں ایک رہائشی مکان سے آگ نمودار ہوئی جس نے آناً فاناً کئی دیگر مکانات کو بھی اپنی لپیٹ میں لے لیا اور اس طرح کئی مکانات آتشزدگی کی نذر ہوگئے۔

انہوں نے مزید کہا کہ آگ لگنے کے اس واقعے میں کم از کم 6 مکانات کو شدید نقصان پہنچا ہے۔ تاہم کسی جانی نقصان کی کوئی اطلاع نہیں ہے۔

ادھر آگ لگنے کی وجہ شارٹ سرکٹ سے منسوب کی جا رہی ہے۔

اس ضمن میں جموں و کشمیر پولیس نے معاملہ درج کر کے مزید تفتیش شروع کر دی ہے۔