انتقام گیری سے دوریاں مزید بڑھیں گی: نیشنل کانفرنس

نیشنل کانفرنس کا کہنا ہے کہ ملک میں کشمیریوں کا جینا دوبھر کر دیا گیا ہے اور حکومتی سطح پر یہاں کے لوگوں کے خلاف جنگ کی جا رہی ہے۔

نیشنل کانفرنس، خواتین ونگ، کی صدر شمیمہ فردوس نے ایک بیان میں کہا کہ ’’یہاں نہ اظہار رائے کے حق کی آزادی ہے اور نہ ہی مذہبی آزادی کی۔ ہر جگہ کشمیریوں کا قافیہ حیات تنگ کر کے رکھ دیا گیا ہے۔ یہ ایک انتہائی تشویشناک صورتحال ہے۔ اگر اس رجحان کو جلد سے جلد ختم نہیں کیا گیا تو اس کے سنگین اور خطرناک نتائج سامنے آنے کے قوی امکانات ہیں۔‘‘

انہوں نے کہا کہ حکومتی اور انتظامی سطح پر برداشت کا فقدان اور انتقام گیری کی آگ اس قدر پیوست ہو گئی ہے کہ راجوری سے تعلق رکھنے والی ایک خاتون آپریشن تھیٹر ٹیکنیشن کو صرف اس لئے نوکری سے بر طرف کیا گیا ہے کہ اس نے مبینہ طور پر ہندوستان اور پاکستان کے درمیان کھیلے گئے کرکٹ میچ کے بعد پاکستانی جیت کے جشن کے ویڈیو کو وہاٹس ایپ سٹیٹس (WhatsApp status ) پر اپلوڈ کیا تھا۔

شمیمہ فروس کا مزید کہنا ہے کہ آگرہ میں کشمیری طلباء کو بی جے پی کارکنوں کے کہنے پر گرفتار کیا گیا اور ان پر الزم عائد کیا گیا ہے کہ انہوں نے پاکستان کی جیت کا جشن منایا ہے۔ انہوں نے کہا کہ انتقام گیری پر مبنی ان اقدامات سے کشمیریوں اور ملک کے درمیان دوریوں میں مزید اضافہ ہوگا۔

نیشنل کانفرنس خواتین ونگ کی صدر نے ایسے اقدامات کی شدید الفاظ میں مذمت کرتے ہوئے گرفتار کیے گئے طلباء کی فوری رہائی اور بر طرف کی گئی ملازمہ کی فوری بحالی کا مطالبہ کیا ہے۔