Kashmir Weather Update کشمیر میں اگلے چوبیس گھنٹوں کے دوران بارش کا امکان

محکمۂ موسمیات کی پیشگوئی کے مطابق کشمیر میں 16 اور 17 اپریل کو موسم میں تبدیلی کے باعث کئی علاقوں میں بارش ہوسکتی ہے۔ وہیں 18 اور19 اپریل کو پہاڑی علاوں میں کہیں کہیں ہلکی برف باری متوقع ہے۔ weather Forecast in Kashmir

سری نگر:محکمۂ موسمیات کی پیش گوئی کے مطابق وادی کشمیر میں اگلے چوبیس گھنٹوں کے دوران گرج چمک کے ساتھ ہلکی بارشوں کا امکان ہے۔ متعلقہ محکمے کے ایک ترجمان نے کہا کہ 15 اپریل کو دو قوی مغربی ہوائیں وارد وادی ہونے کا امکان ہے جس سے موسمی حالات اثر انداز ہونے کی توقع ہے۔ انہوں نے کہا کہ مغربی ہواؤں کی پہلی لہر 16 اپریل کو وادی میں داخل ہوسکتی ہے جس کے نتیجے میں 17 اپریل تک گرج چمک کے ساتھ وقفے وقفے سے کبھی ہلکی تو کبھی تیز بارشیں ہونے کا امکان ہے۔ ان کا کہنا تھا کہ مغربی ہواؤں کی دوسری لہر 18 اپریل کو وارد وادی ہوسکتی ہے۔ ترجمان نے کہا کہ اس لہر کے نتیجے میں ہونے والی بارشوں سے زمین گیلی کے باعث کھلے آسمان تلے نماز عید کی ادائیگی ناممکن ہوسکتی ہے۔

انہوں نے کہا کہ اس کے علاوہ دن کے درجۂ حرارت میں بھی نمایاں کمی واقع ہونے کا امکان ہے۔ ان کا کہنا تھا کہ اس دوران 18 اور 19 اپریل کو میدانی علاقوں میں رک رک کر بارشیں جب کہ پہاڑی علاوں میں کہیں کہیں ہلکی برف باری متوقع ہے۔ ترجمان نے کہا کہ وادی میں 21 اپریل تک موسمی حالات دگرگوں رہنے کا ہی امکان ہے جس کے بعد موسم میں بہتری واقع ہونے کی توقع ہے۔دریں اثنا وادی میں شبانہ درجۂ حرارت میں بتدریج بہتری واقع ہو رہی ہے۔ گرمائی دارلحکومت سری نگر میں کم سے کم درجۂ حرارت 9.1 ڈگری سینٹی گریڈ ریکارڈ کیا گیا جو گزشتہ شب کے درجۂ حرارت سے0.1 ڈگری سینٹی گریڈ زیادہ ریکارڈ ہوا تھا۔ وادی کے شہرہ آفاق سیاحتی مقام گلمرگ میں کم سے کم درجۂ حرارت 7.0 ڈگری سینٹی گریڈ ریکارڈ کیا گیا جو گزشتہ شب کے درجۂ حرارت سے1.6 ڈگری سینٹی گریڈ زیادہ ریکارڈ ہوا تھا۔

وادی کے دوسرے مشہور سیاحتی مقام پہلگام میں کم سے کم درجۂ حرارت 4.6 ڈگری سینٹی گریڈ ریکارڈ کیا گیا جو گزشتہ شب کے درجۂ حرارت سے 1.0 ڈگری سینٹی گریڈ زیادہ ریکارڈ ہوا تھا۔ سرحدی ضلع کپوارہ میں کم سے کم درجۂ حرارت6.2 ڈگری سینٹی گریڈ ریکارڈ کیا گیا جو گزشتہ شب کے درجۂ حرارت سے0.6 ڈگری سینٹی گریڈ ریکارڈ ہوا تھا۔ گیٹ وے آف کشمیر کے نام سے مشہور قصبہ قاضی گنڈ میں کم سے کم درجۂ حرارت 6.2 ڈگری سینٹی گریڈ ریکارڈ کیا گیا جو گزشتہ شب کے درجۂ حرارت سے 0.2 ڈگری سینٹی گریڈ زیادہ ریکارڈ ہوا تھا۔ لداخ یونین ٹریٹری کے ضلع لیہہ میں کم سے کم درجۂ حرارت منفی0.2 ڈگری سینٹی گریڈ جب کہ ضلع کرگل میں کم سے کم درجۂ حرارت 3.3 ڈگری سینٹی گریڈ ریکارڈ ہوا ہے۔

یو این آئی