’خلیل بندھ کے نکلنے سے پارٹی پر کوئی اثر نہیں پڑے گا‘

ریاست جموں و کشمیر کی سیاسی جماعت پی ڈی پی کا کہنا ہے کہ سابق رکن اسمبلی محمد خلیل بندھ کے استعفیٰ دینے سے پارٹی پر کوئی اثر نہیں پڑے گا۔

ای ٹی وی بھارت سے بات کرتے ہوئے پی ڈی پی کے نائب صدر اور سابق وزیر عبدالرحمان ویری کا کہنا ہے کہ ’’اگر کوئی رکن اقتدار کے دوران پارٹی سے علیحدگی اختیار کرتے تو وہ معنی رکھتا ہے، لیکن اپوزیشن میں رہ کر پارٹی چھوڑنا کوئی اچھی روایت نہیں ہے۔‘‘

قابل ذکر ہے کہ محمد خلیل بندھ پی ڈی پی کیطرف سے پلوامہ حلقے سے تین بار رکن اسمبلی رہ چکے ہیں اور انہوں نے بدھ کو پی ڈی پی کی بنیادی رکنیت سے استعفیٰ دے دیا ہے۔

ویری کا کہنا تھا کہ ’’کسی ایک فرد کے نکلنے سے پی ڈی پی پر کوئی اثر نہیں پڑے گا۔‘‘ انکے مطابق پارٹی میں لیڈروں سے زیادہ کارکنان اہمیت رکھتے ہیں۔ جو بقول انکے اب بھی پی ڈی پی کے ساتھ ہی ہیں۔

بتایا جاتا ہے کہ خلیل بندھ نیشنل کانفرنس میں شامل ہونے والے ہیں اور امکان ہے کہ انکو آنے والے اسمبلی انتخابات میں این سی پلوامہ حلقے سے میدان میں اتارے گی۔