لیزر واٹر میوزیکل فوارہ بھی 'پانچ اگست کی نذر'

جموں و کشمیر کے سابق گورنر ستیہ پال ملک نے 'لیزر واٹر میوزیکل فوارہ' کا افتتاح کرنے کے دوران کہا تھا کہ 'یہ سیاحوں اور مقامی لوگوں کے لئے سال بھر کھلا رہے گا تاکہ ڈل جھیل کی رونق مزید دوبالہ ہوجائے'۔

جموں و کشمیر کے مشہور ڈل جھیل میں گزشتہ برس یکم اگست کو سابق گورنز ستیہ پال ملک نے 'لیزر واٹر میوزیکل فوارہ' کا افتتاح کرکے کہا تھا کہ 'یہ سیاحوں اور مقامی لوگوں کے لئے سال بھر کھلا رہے گا تاکہ ڈل جھیل کی رونق مزید دوبالہ ہوجائے اور سیاح بھی اس سے لطف اندوز ہوں'۔

آٹھ کروڑ روپئے کی لاگت پر بنے اس 'لیزر واٹر میوزیکل فوارہ' کو ڈل جھیل میں ایس کے آئی سی سی کے احاطے میں تعمیر کیا گیا تھا اور انتظامیہ کو اس پر نظر رکھنے کی ذمہ داری سونپی گئی تھی۔

ستیہ پال ملک نے مزید کہا تھا کہ اسے دیکھنے کے بعد کشمیر کے نوجوان اور خاص کر بچے لطف اندوز ہو پائیں گے۔ لیکن اس کے افتتاح کے چار دن بعد ہی مرکزی حکومت نے پانچ اگست کو دفعہ 370 منسوخ کرکے جموں و کشمیر میں کرفیو نافذ کردیا جس سے وادی میں حالات ناسازگار ہوگئے۔

یہ سلسلہ آٹھ ماہ تک جاری رہا جس کی وجہ سے وادی کے سیاحتی مقامات سیاحوں کی غیر موجودگی میں ویرانے میں بدل گئے۔ رواں برس اگرچہ حالات معمول پر آنے کی توقع تھی لیکن کووڈ-19 وبا کے پھیلاؤ کو روکنے کے لئے انتظامیہ نے لاک ڈاؤن کے تحت بندشیں عائد کیں جس کی وجہ سے لوگ گھروں میں ہی محدود ہوکر رہ گئے۔

دیگر سیاحتی مقامات کے ساتھ ساتھ یہ 'لیزر واٹر میوزیکل فوارہ' بھی پانچ اگست کی نذر ہوگیا ۔ گزشتہ ایک برس سے بند رہنے کی وجہ سے یہ بے رونق سا ہوگیا ہے۔

'لیزر واٹر میوزیکل فوارہ' کی افتتاحی تقریب پر ہزاروں لوگوں نے شرکت کی تھی جس دوران وہ رنگا رنگ موسقی اور گانوں سے لطف اندوز ہوئے تھے۔