محبوبہ مفتی کی والدہ ای ڈی کے دفتر میں حاضر نہ ہوسکیں

محبوبہ مفتی کی والدہ منی لانڈرنگ معاملے کے سلسلے میں جمعرات کے روز پوچھ گچھ کے لئے انفورسمنٹ ڈائریکٹوریٹ کے دفتر حاضر نہیں ہوئیں۔

منی لانڈرنگ معاملے سے متعلق جمعرات کو سابق وزیر اعلیٰ اور پی ڈی پی صدر محبوبہ مفتی کی والدہ کو پوچھ گچھ کے لئے انفورسمنٹ ڈائریکٹوریٹ (ای ڈی) کے سامنے پیش ہونا تھا۔ تاہم وہ انفورسمنٹ ڈائریکٹوریٹ کے دفتر واقع راج باغ، سرینگر حاضر نہیں ہوئیں۔

محبوبہ مفتی کی والدہ کا پوچھ گچھ کے لیے ای ڈی دفتر حاضر نہ ہونے سے متعلق اگرچہ ابھی تک کوئی بیان سامنے نہیں آیا ہے۔ تاہم پارٹی ذرائع کے مطابق طبیعت ناساز ہونے کی وجہ سے محبوبہ مفتی کی والدہ ای ڈی دفتر نہیں آسکی جبکہ پارٹی صدر محبوبہ مفتی کی دختر التجا مفتی کا چند روز قبل کورونا ٹیسٹ مثبت آنے اور پھر گھر کے باقی افراد خانہ کی علیحدگی اختیار کئے جانے کو بھی محبوبہ مفتی کی والدہ کے پوچھ گچھ کے لئے ای ڈی دفتر حاضر نہ ہونے کی ایک وجہ بتائی جارہی ہے۔

واضح رہے کہ محبوبہ مفتی کی والدہ گلشن کو ای ڈی کی جانب سے ایک نوٹس جاری کی گئی تھی جس میں انہیں 15 اپریل کو انفورسمنٹ ڈائریکٹوریٹ کے دفتر واقع راج باغ سرینگر میں پوچھ گچھ کے لئے حاضر ہونے کو کہا گیا تھا۔

خیال رہے کہ اس سے قبل گزشتہ ماہ پی ڈی پی صدر محبوبہ مفتی ای ڈی کے سامنے پیش ہوئی تھیں جہاں منی لانڈرنگ معاملے سے متعلق ان سے پوچھ گچھ کے علاوہ پشتینی زمین و جائیداد سے متعلق بھی کئی سوالات پوچھے گئے تھے۔