کورونا وائرس: کشمیری تاجر سرکار کو ماسکس فراہم کریں گے

جموں و کشمیر میں سرکار کو کووڈ 19 کیلئے درکار طبی عملے کیلئے ماسکس اور دیگر سامان کی کافی ضرورت ہے اور اس ضمن میں وادی کے تاجروں نے حکومت کو ایک لاکھ ماسکس فراہم کرنے کا اعلان کیا ہے۔

وادی کی تاجر انجمن کشمیر چیمبر آف کامرس اینڈ انڈسٹری کے صدر شیخ عاشق حسین نے ای ٹی وی بھارت کو بتایا کہ انہوں نے گزشتہ دنوں اعلی حکام سے میٹینگ کی جس دوران انہیں یہ معلوم ہوا کہ سرکار کو ماسکس اور دیگر سامان کی اشد ضرورت ہے۔

انہوں نے کہا کہ کشمیری تاجرین اس وبا کا مقابلہ کرنے میں حکومت کے شانہ بہ شانہ کھڑے ہیں، اور فی الحال وہ سرکار کو ایک لاکھ ماسکس فراہم کریں گے۔

ان کا کہنا تھا کہ اگرچہ تاجر گزشتہ برس پانچ اگست کے بعد حالات کی وجہ سے متاثر ہوئے ہیں لیکن پھر بھی وہ سرکار اور سماج کو موجودہ صورتحال سے مقابلہ کرنے کیلئے اپنا بھرپور تعاون دیں گے۔

قابل ذکر ہے کہ جموں و کشمیر میں کووڈ 19 وبا سے اب تک دو افراد کا انتقال ہو چکا ہے جبکہ 106 افراد اس بیماری سے متاثر ہوئے ہیں۔