کشمیر: دو دن کا بچہ کورونا مثبت

مرکز کے زیر انتظام علاقہ کشمیر میں کووڈ 19 کے مثبت معاملات میں روز بروز اضافہ ہو رہا ہے وہیں اس دوران سرینگر میں دو دن کا ایک نوزائیدہ بچہ کورونا مثبت پایا گیا۔

کورونا متاثرہ کمسن بچے کے والدین سرینگر کے چھتہ بل علاقے سے تعلق رکھتے ہیں۔

ذرائع کا کہنا ہے کہ دو دن قبل ہی اس بچے کی پیدائش ہوئی تھی اور اس کا کورونا ٹیسٹ مثبت پایا گیا ہے جس کے بعد اسے سرینگر کے جی بی پنت ہسپتال میں رکھا گیا ہے۔

ڈاکٹروں کا کہنا ہے کہ 'جی بی پنت میں انتظامیہ نے چوتھی منزل پر کووڈ 19 مثبت بچوں کے لیے علاحدہ وارڈ بنایا ہے جہاں خصوصی اسٹاف تعینات کئے گئے ہیں۔

واضح رہے کہ جموں و کشمیر میں کورونا وائرس مثبت کیسز کی تعداد 3600 سے زائد ہے جبکہ اس مہلک وائرس سے مرنے والوں کی تعداد 40 ہوگئی ہے