کشمیر: ٹریڈ الائنس، کار ڈیلرز ایسوسی ایشن کا انتظامیہ کے خلاف احتجاج

ایسوسی ایشن نے انتظامیہ سے مطالبہ کیا کہ گاڑیوں کی رجسٹریشن فیس کے لئے معمولی رقم مقرر کی جائے، جیسے مقامی گاڑیوں کے ٹرانسفر کیلیے وصول کی جاتی ہے۔

جموں و کشمیر کی گرمائی دارالحکومت سرینگر میں کار ڈیلرس ایسوسی ایشن نے بیرونی ریاستوں کی گاڑیوں کی دوبارہ رجسٹریشن کو ٹیکس سے مستثنیٰ رکھنے کی اپیل کرتے ہوئے کہا ہے کہ ٹریفک کی آسان نقل و حرکت کو یقینی بنانے کیلیے اصل معاملات کی طرف توجہ مرکوز کی جائے۔
انہوں نے کہا 'غیر مقامی گاڑیوں کی رجسٹریشن کے وقت پہلے ہی متعلقہ ریاست یا یوٹی میں ان کا ٹوکن ٹیکس ادا کیا جاچکا ہے اور یہاں ان گاڑیوں کی دوبارہ رجسٹریشن سے لوگوں پر اضافی بوجھ بڑھ جائیگا'۔

ایسوسی ایشن نے انتظامیہ سے مطالبہ کیا 'گاڑیوں کی رجسٹریشن فیس کے لئے معمولی رقم مقرر کی جائے، جیسے مقامی گاڑیوں کے ٹرانسفر کیلئے وصول کی جاتی ہے'۔

مقامی کار ڈیلر شوکت احمد نے کہا 'دوبارہ رجسٹریشن پر بھاری ٹیکس لگانے سے لوگوں کیلئے گاڑیوں کی رجسٹریشن کرانا مشکل ہوجائیگا۔ اگر انتظامیہ چاہتی ہے کہ تمام غیر مقامی گاڑیوں کی دوبارہ ریجسٹریشن ہونی چاہیے تو حکومت کو اس کیلئے برائے نام معمولی رقوم وصول کرنی چاہئے'۔

انہوں نے مزید کہا 'غیر ریاستی گاڑیوں کا ٹیکس پہلے ہی لیا جاتا ہے اور اب جبکہ ہمیں کشمیر میں دوبارہ ٹیکس دینے کو کہا جا رہا ہے، یہ سرا سر نا انصافی ہے'۔