نظر بند پی ڈی پی رہنما غلام نبی لون کے آبائی گھر میں نقب زنی

پی ڈی پی کے سینیئر رہنما اور سابق وزیر غلام نبی لون جو فی الحال سرینگر میں واقع سرکاری رہائش گاہ میں نظر بند ہیں، ضلع بڈگام کے ہانجورہ میں واقع ان کے آبائی مکان میں گزشتہ ہفتے مبینہ طور پر چوری کی واردات انجام دی گئی تھی۔

غلام نبی لون کے فرزند مظفر بنی لون نے ای ٹی وی بھارت کو بتایا کہ پانچ روز قبل وہ اپنی ماں کے ساتھ اپنے آبائی گھر ہانجورہ گئے تھے لیکن گھر میں داخل ہوتے ہی انہوں دیکھا کہ سارا سازو سامان تہس نہس کیا گیا تھا اور گھر کے کئی دروازے اور کھڑکیاں ٹوٹی ہوئی تھیں۔

مظفر نبی لون نے بتایا کہ پانچ اگست کے بعد حکومت نے انک ے آبائی گھر میں تعینات سیکورٹی کو واپس بلایا تھا اور نامساعد حالات کی وجہ سے اہل خانہ گھر میں نہیں بیٹھ سکتے تھے۔

ان کا کہنا تھا کہ انہوں نے پولیس میں چوری کے واقع کی رپورٹ درج کرائی ہے اور چوری ہوئے سامان کا تخمینہ تحقیقات کے بعد ہی معلوم ہو سکتا ہے۔

واضح رہے کہ غلام نبی لون اس وقت سرینگر کے تلسی باغ میں واقع سرکاری رہائش گاہ میں اپنے اہلخانہ کے ساتھ مقیم ہیں جہاں وہ چوبیس گھنٹے سکیوریٹی اہلکاروں کی نگرانی میں ہوتے ہیں۔