جموں و کشمیر میں دربار مو کی 149سالہ قدیم روایت کا خاتمہ

جموں و کشمیر انتظامیہ نے دربار مو سے جڑے سیکریٹریٹ کے ملازمین کو جموں اور سرینگر میں 3 ہفتوں کے اندر اندر سرکاری رہائش گاہیں خالی کرنے کا نوٹس جاری کیا ہے۔

لیفٹیننٹ گورنر انتظامیہ نے بدھ کو جاری کیے گئے ایک حکمنامے کے تحت جموں و کشمیر میں جاری 149سالہ قدیم روایت کو ختم کرتے ہوئے سیکریٹریٹ کے ملازمین کو جموں اور سرینگر میں الاٹ کی گئی سرکاری رہائش گاہوں کو 21دنوں کے اندر خالی کرنے کے احکامات صادر کئے۔

اس ضمن میں کمشنر سیکریٹری محکمہ اسٹیٹ ایم راجو کی جانب سے جاری کردہ آرڈر میں کہا گیا ہے کہ سیکریٹریٹ میں تمام افسروں اور ملازمین کو تفویض کیے گئے رہائشی کوارٹروں کی منسوخی کو منظوری دی گئی ہے اور کوارٹروں کو تین ہفتے کے اندر خالی کیا جانا چائیے۔

ای سسٹم متعارف کئے جانے سے اب سال بھر سیکریٹریٹ میں جموں اور سرینگر میں فائیلوں کی منتقلی کے بغیر ہی بیک وقت کام کاج انجام دیا جا سکتا ہے اس عمل سے نہ صرف لوگوں کو آسان ہوگی بلکہ دربار مو کی منتقلی سے کروڑوں روپے بھی بچ سکیں گے۔

لیفٹینٹ گورنر منوج سنہا نے 20 جون کو اعلان کیا تھا کہ دوبار مو کی منتقلی کو ختم کئے جانے سے 2 سو کروڑ روپے کی بچت ہوگی اور اس رقم کو نوجوانوں کی فلاح و بہبود کی خاطر استعمال میں لایا جائے گا۔

واضح رہے کہ صدیوں سے سول سیکریٹریٹ جموں اور کشمیر صوبے میں دو شفٹوں میں کام کرتا تھا، - 6ماہ سرمائی داراحکومت جموں اور 6 ماہ گرمائی دارالحکومت سرینگر میں - تاہم اب ای سسٹم رائج کئے جانے سے مہاراجہ گلاب سنگھ کے دور اقتدار سے جاری 149سالہ دربار مو کی قدیم روایت ختم ہو گئی۔