پیپلز کانفرنس کے صدر سجاد غنی لون نے جمعہ کو جنگ بندی معاہدے کی خلاف ورزی کے دوران شمالی کشمیر اور پونچھ ضلع میں ہوئے انسانی جانوں کے ضیاع پر شدید رنج و غم کا اظہار کیا ہے۔
سماجی رابطہ کی ویب سائٹ پر اپنے خیالات کا اظہار کرتے ہوئے انہوں نے کہا کہ ’’ایک بار پھر سے اوڑی، ٹنگڈار اور پونچھ میں جنگ بندی معاہدے کی خلاف ورزی کے سبب معصوم جانیں ضائع ہوئیں۔ دور جدید کی اس بربریت کی مذمت کرنے کے لیے الفاظ نہیں ہیں۔‘‘
ان کا مزید کہنا تھا کہ ’’مجھے امید ہے کہ انتظامیہ متاثرہ لوگوں کو مدد فراہم کرے گی۔ میں فوت ہوئے افراد کے لئے دعا کرنے کے علاوہ لوگوں کو احتیاط اور سمجھداری سے کام لینے کا مشورہ دیتا ہوں۔‘‘
قابل ذکر ہے کہ حد متارکہ (لائن آف کنٹرول) پر بھارت - پاک افواج کے درمیان گولہ باری کے تبادلے میں سات افراد کے ہلاک ہونے کی تصدیق آرمی کی جانب سے کی گئی ہے۔
ہلاک ہونے والوں میں بارڈر سکیورٹی فورس (بی ایس ایف) کا ایک سب انسپکٹر، تین فوجی اور تین عام شہری بھی شامل ہیں۔