مسئلہ کشمیر حل کرنا اقوام متحدہ کی ذمہ داری: حریت کانفرنس

میر واعظ عمر فاروق کی قیادت والی علیحدپسند جماعت حریت کانفرنس نے گزشتہ کل سرینگر میں ایک مقامی خاتون کی ہلاکت پرغم اور صدمے کا اظہار کرتے ہوئے اس کی مذمت کی ہے۔

حریت کانفرس کی جانب سے میڈیا کو جاری کیے گئے ایک بیان میں بٹہ مالو میں خاتون کی ہلاکت کے حوالے سے کہا گیا ہے کہ ’’فورسز کے ہاتھوں کشمیریوں کی ہلاکت کے واقعات گزشتہ ۳۰ برسوں سے بلا روک ٹوک جاری ہیں جو حد درجہ افسوسناک اور تشویشناک ہے۔‘‘

حریت کانفرنس نے اقوام متحدہ کے سیکریٹری جنرل انتونیو گوتریس کے حالیہ بیان کا خیر مقدم کرتے ہوئے کہا ہے کہ ’’جموںوکشمیر میں انسانی حقوق کی پامالیوں اور ہلاکتوں کے عمل کو رکوانے اور اس دیرینہ تنازع کو پر امن طریقے سے حل کرانے کی آئینی، اخلاقی اور قانونی طور پر اقوام متحدہ کی ذمہ داری ہے۔‘‘

بیان میں مزید کہا گیا ہے کہ ’’اب وقت آچکا ہے کہ بھارت اور پاکستان جموں و کشمیر کی عوام کی خواہشات اور امنگوں کو مدنظر رکھ کر اس دیرینہ مسئلہ کو حل کرنے کیلئے سنجیدہ اقدامات اٹھائیں تاکہ جموںوکشمیر میں ہلاکتیں بند ہونے کے ساتھ ساتھ یہاں کے عوام عدم تحفظ کے ماحول سے باہر نکل کر وقار اور شائستگی کی زندگی گزار سکیں۔‘‘