سینٹرل جیل کا واقعہ تشویشناک، تحقیقات کے احکامات

سنٹرل جیل سرینگر میں پیش آئے پُر تشدد واقعے کی تحقیقات کے احکامات جاری کیے گئے ہیں ،اس معاملے کی تفتیش سرینگر کے ضلع مجسٹریٹ شاہد اقبال چودھری کریں گے ۔

ای ٹی وی بھارت کے ساتھ بات کرتے ہوئےسرینگر کے ضلع مجسٹریٹ شاہد اقبال چودھری نے بتایا کہ جیل میں ایسا واقع ہونا تشویش ناک ہے اور ایسا حادثہ نہیں ہونا چاہیے تھا۔

انہوں نے اس واقعے کی تفصیل بتاتے ہوئے کہا کہ پچھلے ہفتے جیل کی ایک جوڈیشل کمیٹی کی رپورٹ کے بعد وہاں کچھ بیرکوں میں مرمت کا کام کیا جانا تھا۔

انہوں نے کہا کہ سینٹرل جیل میں 525 سے زیادہ قیدی ہیں جن میں کچھ شکایت کو لے کر پہلے ہی ابال تھا اور کل شام کے کھانے کے بعد انہوں نے تنائو کھڑا کیا اور تشدد پھوٹ پڑا۔

انہوں نے کہا کہ قیدیوں نے جیل سکیورٹی پر حملہ کیا اور چار گیس سلنڈروں کی مدد سے کا دھماکے کیے جس سے وہاں چار بیرکو اور دیگر تعمیرات میں نقصان پہنچا۔

تاہم انہوں نے کہا اس واقعے میں کسی بھی قیدی کی شدید زخمی ہونے کی کوئی خبر نہیں ہے البتہ کچھ معمولی زخمی ہوئے ہوں گے۔

انہوں نے قیدیوں کے لواحقین کو یقین دہانی کراتے ہوئے کہا کہ سب قیدی محفوظ ہیں اور اس وقت حالات ٹھیک ہوئے ہیں۔

انہوں نے کہا کہ ان کی سربراہی میں اس سارے معاملے کی تحقیقات کی جائے گی۔

واضح رہے کہ کل جمعرات کی شام کو سری نگر کے رعناواری میں واقع سینٹرل جیل میں قیدیوں اور جیل انتظامیہ کے درمیان جھڑپیں ہوئیں جو رات گئے چلی اور ان کو صبح قابو میں لایا گیا۔

اس معاملے کو لے کر قیدیوں کے لواحقین میں انکی حفاطت کو لے کر کافی تشویش پائی گئی۔