’افسراں ہمارے ساتھ سوتیلی ماں کا سلوک کرتے ہیں'

کشمیر صوبے سے تعلق رکھنے والے بلدیاتی کونسلروں نے بیریوکریٹس اور بلدیاتی ایکزیکیٹو افسران پر ان کے ساتھ سوتیلی ماں کا سلوک کرنے کا الزام عائد کیا ہے۔

سرینگر میں ایک پریس کانفرس سے خطاب کرتے ہوئے نئی تشکیل شدہ مونسپل پریزیڈنٹس اور کونسلرز کارڈینیشن کمیٹی کے چیئرمین محمد اقبال آہنگر نے کہا کہ ’’وادی کے اضلاع میں قائم بلدیاتی ایکیزیکٹو افسران اور بیریوکریٹس بلدیاتی نظام کو لوگوں کی بہبود کیلئے چلانے میں دلچسپی نہیں دکھا رہے ہیں۔‘‘

انکا مزید کہنا تھا کہ گورنر انتظامیہ نے انکی تنخواہیں اور دیگر مراعات کو سات مہینوں سے واگزار نہیں کیا ہے۔

قابل ذکر ہے کہ گزشتہ برس نومبر میں نامسائد حالات کے بیچ بلدیاتی اور پنچایتی انتخابات منعقد کئے گئے تھے۔ تاہم ریاست کی مین اسٹریم سیاسی جماعتیں نیشنل کانفرنس اور پی ڈی پی نے ان انتخابات کا بائکاٹ کیا تھا۔

محمد اقبال نے گورنر انتظامیہ سے التجاء کی کہ وہ انکی مانگوں کو جلد از جلد پورا کرے۔