Self Styled Dentist Arrested سرینگر میں جعلی دندان ساز گرفتار

سرینگر شہر کے ڈاؤن ٹاؤن علاقے میں جموں و کشمیر پولیس ٹیم نے ایگزیکٹیو مجسٹریٹ کی نگرانی میں ایک جعلی ڈینٹسٹ کے کلنک کو سربمہر کرتے ہوئے خود ساختہ دندان ساز کو گرفتار کر لیا۔

سرینگر (جموں و کشمیر) :جموں وکشمیر کی گرمائی راجدھانی سرینگر کے کنہ کدل علاقے میں جموں و کشمیر پولیس نے نقلی دندان ساز کو دھر دبوچ کر سلاخوں کے پیچھے دھکیل دیا۔ پولیس نے ٹویٹ کے ذریعے معلومات فراہم کرتے ہوئے بتایا کہ ’’نقلی دندان ساز (Fake Dentist) جس کی شناخت خورشید احمد بٹ ولد عبدالرشید بٹ ساکنہ کنہ کدل کے طور پر ہوئی ہے کی گرفتاری عمل میں لائی گئی۔‘‘

سرینگر پولیس نے مزید بتایا کہ گرفتار شخص کے خلاف ایف آئی آر زیر نمبر 50زیر دفعہ 420آئی پی سی کے تحت شہید گنج، پولیس تھانہ میں کیس درج کرکے مزید تحقیقات شرو ع کی گئی ہے۔ ذرائع کے حوالہ سے موصول ہوئی اطلاع کے مطابق ایگزیکٹیو مجسٹریٹ، جو پولیس چھاپے کے ہمراہ تھے، نے ڈینٹل کلینک کو سیل کیا ہے۔ جموں و کشمیر محکمہ صحت کے علاوہ پولیس کی جانب سے سے جعلی ڈاکٹروں اور نقلی دوا فروشوں کے خلاف مہم وقتاً فوقتاً مہم چلائی جا رہی ہے، جس کی عوامی حلقوں کو کافی پذیرائی کی جا رہی ہے۔

قبل ازیں، اسی طرح کے ایک اور واقعے میں وسطی کشمیر کے بڈگام ضلع کے مین بازار میں۔ رواں برس مارچ کے اواخر میں، ایک میڈیکل شاپ پر پریکٹس کرنے والا ایک خود ساختہ ڈاکٹر اپنی اسناد پیش کرنے میں ناکام رہا اور حکام نے اس کی تحقیقات شروع کر دی تھی۔ قابل ذکر ہے کہ سنہ 2022 میں جموں و کشمیر میں آیوشمان بھارت ڈیجیٹل مشن پورٹل پر ایک درجن ’’ڈاکٹروں‘‘ کی ایم بی بی ایس ڈگریوں کی سرٹیفکیٹ جعلی پائی گئی تھی۔