سرینگر: سی آئی ڈی انسپکٹر کا گولی مار کر قتل

مشتبہ عسکریت پسندوں نے سرینگر کے مضافات میں جموں و کشمیر پولیس کے انسپکٹر پرویر احمد پر نزدیک سے گولیاں چلا کر ابدی نیند سلا دیا۔

جموں و کشمیر پولیس کے کرائم انویسٹی گیشن ڈپارٹمنٹ (سی آئی ڈی) انسپکٹر پرویز احمد ڈار کو نامعلوم عسکریت پسندوں نے سرینگر کے مضافاتی علاقے نوگام میں گولی مار کر ہلاک کر دیا۔

پولیس کے مطابق پرویز ڈار پارمپورہ تھانے میں تعینات تھے۔ 22 جون کی شام اپنے گھر کے نزدیک نماز ادا کر کے واپس آ رہے تھے تب ہی نامعلوم عسکریت پسندوں نے ان پر گولیاں چلائیں جس کے نتیجے میں وہ شدید طور پر زخمی ہوئے۔ زخمی حالت میں انہیں ہسپتال منتقل کیا گیا تاہم وہ زخموں سے جانبر نہ ہو سکے اور راستے میں ہی دم توڑ دیا۔

پولیس نے اس واقعہ کی سی سی ٹی وی ویڈیو بھی جاری کی ہے جس میں پرویز احمد پر دو مبینہ عسکریت پسند نزدیک سے گولیاں چلاتے نظر آ رہے ہیں۔ پہلے ایک مبینہ عسکریت پسند ان پر پیچھے سے پستول سے گولی چلاتا ہے بعد میں دوسری سمت سے دوسرا حملہ آور آتا ہے۔ ویڈیو میں دیکھا جا سکتا ہے کہ پرویز پر کئی گولیاں چلائیں گئی۔

پولیس ذرائع نے بتایا کہ حملے کے ذمہ دار عسکریت پسندوں کی شناخت کے لئے علاقے کی سی سی ٹی وی فوٹیج چیک کی جارہی ہے جبکہ کچھ مشتبہ افراد سے پوچھ گچھ کی جارہی ہے۔

انہوں نے بتایا ڈار نے اپنے پیچھے اہلیہ، 13 سالہ بیٹی اور 10 سالہ بیٹے کو چھوڑا ہے۔

پولیس نے اس سلسلے میں قانون کے متعلقہ دفعات کے تحت مقدمہ درج کرلیا ہے اور مزید تحقیقات جاری ہے۔

واضح رہے کہ حالیہ دنوں میں عسکریت پسندوں کی جانب سے پولیس اہلکاروں پر حملے کا تیسرا واقع ہے۔

یہ حملہ عسکریت پسندوں کی جانب سے سوپور تصادم کے ایک دن بعد کیا گیا ہے۔ سوپور میں لشکر طیبہ کے تین عسکریت پسند ہلاک ہوئے تھے۔

اس ضمن میں جموں وکشمیر کی سابق وزیراعلیٰ محبوبہ مفتی نے واقعہ کی مذمت کرتے ہوئے مقتول انسپکٹر پرویز احمد ڈار کے افرادِ خاندان سے تعزیت کا اظہار کرتے ہوئے کہا کہ غم کی اس گھڑی میں مرحوم کے افرادِ خاندان کے غم میں وہ برابر کی شریک ہیں۔

سرینگر: سی آئی ڈی افسر کا گولی مار کر قتل