جموں وکشمیر سی آئی ڈی کشمیریوں کو ہراساں کرنے کا کام کرتی ہے: محبوبہ مفتی

محبوبہ مفتی نے کہا جموں و کشمیر کی تفتیشی ایجنسی، سی آئی ڈی بھی ان ایجنسیوں میں شامل ہو گئی ہے جس کو مرکزی حکومت مخالفین کو ہراساں کرنے کے لئے استعمال کر رہی ہے۔

جموں و کشمیر کی سابق وزیر اعلیٰ اور پی ڈی پی کی صدر محبوبہ مفتی نے مرکزی و علاقائی تحقیقاتی ایجنسیوں پر سخت برہمی کا اظہار کیا اور کہا کہ جموں و کشمیر کی تفتیشی ایجنسی، سی آئی ڈی بھی ان ایجنسیوں میں شامل ہو گئی ہے جس کو مرکزی حکومت مخالفین کو ہراساں کرنے کے لئے استعمال کر رہی ہے۔

انہوں نے سلسلہ وار ٹویٹس میں لکھا: 'جموں و کشمیر سی آئی ڈی نے مرکزی ایجنسیوں کی فہرست میں شمولیت اختیار کرلی ہے جو کشمیریوں کو ہراساں کرنے کے لئے کام کرتی ہیں۔ وحید پرہ کے خلاف الزامات ثابت کرنے میں ناکام رہنے کے بعد سی آئی ڈی نے ایس آئی ٹی کے سربراہ کی جگہ لے لی کیونکہ اس نے ایجاد کردہ (فرضی) الزامات کی تشکیل میں ان کا ساتھ دینے سے انکار کردیا۔'

'جھوٹے الزامات کو تسلیم کرنے کے لئے وحید پرہ پر ظلم و ستم کیا جارہا ہے۔ چونکہ وحید نے جھوٹے الزامات کو تسلیم نہیں کیا اسلئے اسے غیر انسانی حالات میں رکھا جارہا ہے۔ یہ تفتیش دھوکہ پر مبنی ہے اور اس کے سیاسی مقاصد ہیں۔'

محبوبہ نے لکھا: 'اس طرح کی دھوکہ دہی پر مبنی تفتیش انجام دینے کا رواج معمول بن گیا ہے جس میں 'مجھے آدمی دکھائیں اور میں آپ کو جرم دکھاتا ہوں' کا منطق اپنایا جاتا ہے۔ شرمناک اور افسوسناک امر ہے کہ ان اقدامات سے اداروں کو بدنام کیا جاتا ہے جبکہ ان اداروں کا مقصد قانون و امان کو برقرار رکھنا ہے۔'