میگا فروٹ منڈی شوپیان میں کاروبار بحال

جنوبی کشمیر کے اگلر شوپیان میں واقع پھلوں کی سب سے بڑی منڈی کو دوبارہ کھول دیا گیا ہے، اس منڈی سے ملک کی دیگر ریاستوں میں میوے پھل بھیجے جاتے ہیں۔

کورونا وائرس اور لاک ڈاؤن کی وجہ سے تمام تر سرگرمیاں بالکل ٹھپ پڑی تھیں، اس دوران لوگوں کو کافی مشکلات کا سامنا کرناپڑاتھا، لیکن اب رفتہ رفتہ حالات معمول پر آرہے ہیں، تاہم اگلر پھلوں کی منڈی میں اب دوبارہ کاروبار شروع ہوگیا ہے۔

اس خبر سے میوہ کاشتکار، بیوپاری، ڈرائیورز اور مزدور طبقے میں خوشی پائی جارہی ہے۔ ضلع شوپیان کو پوری دنیا میں بہترین سیبوں کی وجہ سے جانا جاتا ہے جو سالانہ پیداوار 2.50 لاکھ میٹرک ٹن سیب پیدا کررہا ہے۔

یہاں کی پیداوار ملک کی مختلف ریاستوں میں بھیجی جاتی ہے جس کی قیمت مارکیٹ میں بہت اچھی ہے۔ضلع شوپیان میں آج ناشپاتی، اٹلی سیب اور کولو سیب ملک کی دیگر ریاستوں میں بھیجنے کے لیے تیار ہیں۔جسکی وجہ سے ضلع انتظامیہ نے آرہامہ شوپیان میں واقع پرانی فروٹ منڈی کو منتقل کرکے میگا فروٹ منڈی اگلر شوپیان میں کاروبار شروع کرنے کی اجازت دی ہے۔

پرانی فروٹ منڈی آراہامہ میں کم جگہ ہونے کی وجہ سے سیب کے کاروبار سے منسلک افراد کو کافی مشکلات کا سامنا تھا کیونکہ شوپیان ضلع کے ساتھ ساتھ جنوبی کشمیر کے کولگام اور پلوامہ اضلاع کے سیب کے کاشتکار بھی اپنے سیب اسی منڈی میں فروخت کرنے کے لیے لاتے تھے اور آرہامہ فروٹ منڈی میں کم جگہ ہونے کی وجہ کافی دقتوں کا سامنا تھا۔

تاہم اب اگلر شوپیان میں قائم کی گئی نئی میگا فروٹ منڈی میں کام کاج شروع کر دیا گیا ہے۔ فروٹ منڈی اگلر شوپیان میں ای ٹی وی بھارت نے کرونا وائرس کے متعلق کئی افراد سے بات چیت کی۔تاہم انہوں نے کہا کہ ہم ایس او پیز کی پیروی کریں گے۔ منڈی میں ہر ایک فراد کو پی پی ای کٹ فراہم کی جائے گی اس کے علاوہ سماجی دوری کا بھی مکمل خیال رکھا جائے گا۔