سرینگر: 17 سالہ نوجوان نے جہلم میں چھلانگ لگاکر خودکشی کی

سرینگر کے نورباغ علاقے میں سیمنٹ پل سے دریائے جہلم میں چھلانگ لگاکر ایک اور نوجوان نے اپنی زندگی کا خاتمہ کرلیا۔

شمالی کشمیر کے ضلع کپوارہ سے تعلق رکھنے والے ایک 17 برس کے نوجوان نے گزشتہ شب سرینگر کے نور باغ علاقے میں دریائے جہلم میں چھلانگ لگاکر خودکشی کرلی۔

پولیس کے مطابق ’’کپوارہ کے رہنے والے ثاقب احمد آہنگر نے جمعہ کی شام دریائے جہلم میں چھلانگ لگاکر خودکشی کر لی، وہ سرینگر کے شہر خاص کے کاوڈارہ علاقے میں اپنے رشتہ دار کے ساتھ کرائے پر مقیم تھے۔‘‘

ثاقب گیارہویں جماعت کا طالب علم تھا اور خودکشی سے قبل اس نے ایک ویڈیو ریکارڈ کیا جس میں اس نے اپنے والدین سے معافی مانگی ہے۔

قابل ذکر ہے کہ رواں ماہ کے دوران نورباغ علاقے میں سیمنٹ پل سے خودکشی انجام دیے جانے کا یہ تیسرا معاملہ ہے۔ خودکشی کے بڑھتے رجحان پر عوامی حلقوں میں تشویش کی لہر دوڑ گئی ہے۔