وادی میں جاری شدید سردی کی لہر کے بیچ ہفتے کی صبح بالائی علاقوں میں ہلکی برفباری جبکہ میدانی علاقوں میں بارشوں کا سلسلہ شروع ہوگیا جس کی وجہ سے سردی کی لہر میں مزید اضافہ ہوا۔
وادی میں ایک ہفتہ سے جاری سردی کی لہر میں اضافہ ہوا ہے۔ اس دوران ہفتے کی صبح گلمرگ، سونہ مرگ، پیر کی گلی، گریز اور اس کے مضافات میں ہلکی برفباری شروع ہوگئی۔
اسی طرح میدانی علاقوں میں بھی بارشوں کا سلسلہ شروع ہوا ہے۔
ادھر جنوبی کشمیر کے شوپیان ضلع کو صوبہ جموں کے پونچھ اور راجوری اضلاع سے جوڑنے والی متبادل شاہراہ مغل روڈ پر تازہ برفباری اور بارشوں کی وجہ سے روڈ کو ٹریفک کی آمد رفت کے لئے بند کردیا گیا ہے۔
واضح رہے محکمہ موسمیات نے اس سے قبل ہی جموں و کشمیر بالخصوص کشمیر میں 13 نومبر سے برفباری اور بارش کی پیش گوئی کی تھی۔
محکمہ موسمیات کے ڈائریکٹر سونم لوٹس نے بتایا تھا کہ 13 نومبر کو مغربی ہوائیں کشمیر میں داخل ہوں گی جس کی وجہ سے موسم میں تبدیلی ائی گی اور سردی کی شدت میں اضافہ ہوگا۔
پیش گوئی کے عین مطابق آج کشمیر میں بارش و برفباری کا سلسلہ شروع ہوا۔