شوپیان میں فورسز اور عسکریت پسندوں کے درمیان گولیوں کا تبادلہ

شوپیان ضلع کے ملڈیرہ علاقے میں عسکریت پسندوں کی موجودگی کی خفیہ اطلاع ملنے پر سکیوریٹی فورسز نے علاقے کو گھیرے میں لیکر سرچ آپریشن شروع کر دیا ہے۔

جنوبی کشمیر کے ضلع شوپیان میں سنیچر دوپہر کے بارہ بجے سکیوریٹی فورسز اور عسکریت پسندوں کے درمیان گولیوں کا تبادلہ ہوا تاہم جانی نقصان کی کوئی اطلاع نہیں ملی ہے۔ فورسز نے علاقے کو محاصرے میں لیکر تلاشی آپریشن کو جاری رکھا ہوا ہے۔

تفصیلات کے مطابق شوپیان ضلع کے ملڈیرہ علاقے میں عسکریت پسندوں کی موجودگی کی خفیہ اطلاع ملنے پر سکیوریٹی فورسز نے مشترکہ طور پر علاقے کو گھیرے میں لیکر عسکریت پسندوں کو ڈھونڈ نکالنے کی کوشش شروع کردی۔ تلاشی کارروائیوں کے دوران جب فورسز اہلکار ایک مشکوک باغیچے کی طرف بڑھنے لگے تو وہاں موجود عسکریت پسندوں نے فورسز اہلکاروں پر فائرنگ کی۔

فورسز اہلکاروں نے پوزیشن سنبھال کر جوابی کارروائی کرتے ہوئے عسکریت پسندوں پر فائرنگ کی جو مقامی لوگوں کے مطابق قریب کچھ ہی منٹ تک جاری رہی۔
طرفین میں فائرنگ کا تبادلہ جارہی رہنے کے بعد بندوقیں خاموش ہوگئی اور فائرنگ رک گئی۔تاہم گولیوں کے تبادلہ میں کسی کے زخمی یا ہلاک ہونے کی کوئی اطلاع نہیں ملی ہے۔ یہ خبر لکھنے تک فورسز اہلکاروں نے عسکریت پسندوں کو ڈھونڈ نکالنے کے لئے علاقے کو گھیرے میں لیکر تلاشی آپریشن جاری رکھا ہوا ہے۔