شوپیان میں نابالغ لڑکے کی خودکشی

ضلع شوپیان کے ہیف شرمال علاقہ میں ایک نابالغ لڑکے نے خودکشی کی ہے۔اس حوالہ سے پولیس نے خودکشی کی وجہ کو جاننے کے لئے تحقیقات شروع کردی ہے۔

جنوبی کشمیر کے ضلع شوپیان کے ہیف شرمال علاقہ میں ایک نابالغ لڑکے نے اپنے گھر میں پھانسی لگا کر خودکشی کرلی۔

مقامی لوگوں کے مطابق 14 سالہ نابالغ لڑکا اپنے گھر کی چھت کے پنکھے کے ساتھ لٹکا ہوا پایا گیا۔مزکورہ لڑکا آٹھویں جماعت کا طالب علم تھا۔ پولیس نے اس سلسلہ میں مقدمہ درج کرکے تحقیقات شروع کردی ہے۔

دوسری جانب گزشتہ روز شوپیان کے ناگبل، اروپارہ علاقے سے تعلق رکھنے والے 22 سالہ نوجوان شاہد منظور ولد منظور احمد گنائی کی لاش ضلع کے ترکوانگام علاقے میں برآمد ہوئی تھی۔

لواحقین نے پلوامہ میں احتجاج کرتے ہوئے اسے قتل قرار دے کر پولیس اور انتظامیہ سے تفتیش کا مطالبہ کرتے ہوئے قاتلوں کو سزا دیے جانے کی مانگ کی۔

نوجوان کے لواحقین نے دعویٰ کیا کہ 'شاہد کے ترکوانگام (جہاں سے اسکی لاش برآمد ہوئی ہے) کی ایک لڑکی کے ساتھ تعلقات تھے جس کے ساتھ وہ نکاح کا خواہش مند تھا۔'

انہوں نے الزام عائد کرتے ہوئے کہا کہ 'لڑکی نے اسے ترکوانگام ملنے کے لیے بلایا تھا۔'